Majoriami siunnersuisartutut ilinniagaqarneq aallartippoq

Innuttaasut suliffissaaleqisut nunatsinni sumiikkaluarunilluunniit sapinngisamik pitsaanerpaamik, suliassartaannillu isumaginniffiunissaannik Inuussutissarsiornermut Suliffeqarnermullu Naalakkersuisoqarfiup aamma Niuernermik Ilinniarfiup akornanni suleqatigiinneq qularnaarivoq.

Majoriami siunnersuisartutut ilinniagaqarnermik nutaarluinnarmik Majoriami suliffissarsiuussisarfinni atorfeqartunit 20-nit peqataaffiusumik ilinniaqatigiit ilinniagaqartitaanerat Niuernermik Ilinniarfiup ullumikkut marlunngorneq 27. oktobari 2020-mi aallarteqqammerpaa.

”Ilinniagaqarnerup aallartinnera nuannaarutigaara, taamatullu pisoqarnerani peqataasusi pitsaasumik ingerlalluarnissarsi, aammalu pissarsiaqarfigilluassagissi kissaatigalugu oqarusuppunga. Nalunngeriissagaluarparsi, kisiannili suliassanik isumaginnissinnaanissinnut ilisimasat annertunerit pissarsiarigussigit, aammalu tapersersuinissamut piginnaasaqarsinnaanersi annertusitillugu suliarisassasi nuannarinerulissavasi; ilissinnut suliarisassinnullu qularunnaarnerussaasi, innuttaasullu taakku, inuunerminni ingerlariaqqinnissaminnut ilissi ikiuinissinnik pisariaqartitsisut ikiornissaannut soorunami pikkorinnerulissaasi. Taamaattumillu tamanna tassaarpiarpoq taamatut suliaqarnitsinnut pissutaasoq,”
Jess Svane oqarpoq nangillunilu:

”Ilinniagaqarneq ulluni suliffigisassinnik misilittakkassinnillu aallaaveqarpoq, aammalu ilinniarnissi nalaani siunissamilu ilissinnik atorluaasarnissarsi isumaavoq. Illoqarfiit kommunillu killeqarfigisaat apeqqutaanatik Majoriami siunnersuisartut akornanni kinguneqartussamik suleqatigiinnissamut ilinniagaqarnerup tunngaviliissanera neriuutigaarput, aamma attaveqaateqarfissi piginnaasassilu qanoq ineriartuaarneranik malinnaaviginissarsi qilanaaraarput.”


Niuernermik Ilinniarfimmi pisortaq Christel Lund Bøjler ilinniagaqarnerup saqqummiunnera pillugu oqarpoq: ”Ineriartortitsinermik ingerlassaq pissanganartuusimavoq, Majoriamilu siunnersuisartut piginnaanngorsarnissaannut toqqammavissiiniarnermut peqataasimanini Niuernermik Ilinniarfiup assut nuannaarutigaa. Majoriami ilinniagaqarnerup siunnersuisartut inuttut piginnaasaqaleriartornissaminnut, ullunilu suliffigisani suleriaatsikkut ingerlattakkat suliaqarfiusut suuneri qaangerlugit ineriartortinnissaannut ilisimasanik sakkussanillu tunissavai, aammalu innuttaasut naapinnerini kingunissaqartitsiniartutut periusaasussamik tunissallugit.”

Ilinniakkap saaffigisai tassaapput innuttaasunik suliffissaaleqisunik sulianik isumaginnittartut Majoriami kommunini sulisut. Illoqarfinnik kommuninillu akimuisunik sulinermut tunngasutut attaveqarfinnik nukittuunik pilersitsinissamut ilinniagaqarneq ilalersueqataassaaq.


Inussiarnersumik inuulluaqqusillunga

Jess Svane, Suliffeqarnermut, Ilisimatusarnermut Avatangiisinullu Naalakkersuisoq


Annertunermik paasissutissat pissarsiariniarukkit attavigiuk: Naalakkersuisoqarfiup pisortaa Isak Nielsen Kleist, e-mail: ISIIN@nanoq.gl