Ilaasunik angallassineq pillugu kiffartuussinissamik isumaqatigiissutissat Aningaasaqarnermut Akileraartarnermullu Ataatsimiititaliamut saqqummiunneqarnissaannut piareerput

Ilaasunik angallassineq pillugu kiffartuussinissamik isumaqatigiissutissat sivisuumik isumaqatiginninniutigineqareersullu, isumaqatigiissutissatut siunnersuut Naalakkersuisut ullumikkut akuersissutigaat.

Aningaasaqarnermut Akileraartarnermullu Ataatsimiititaliap 2020-mi marsip qaammataani akuersissuteqarneratigut Naalakkersuisunit aalajangersarneqarluni, isumaqatiginninniarnissamut piginnaatitsissutip killiliussaata iluani isumaqatiginninniarnerit ingerlanneqarput.

COVID-19 patsisaalluni, upernaarlu nunatsinnik matusinermi qitiusumik allaffeqarfiup ingerlatsisullu eqqugaanerisigut isumaqatiginninniarnerit kinguartoorput.

Massakkut isumaqatigiissutit aallaavigalugit atuisut misilittagaat, nunatsinnilu siunissami ilaasunik angallassinissami kissaatit isumaqatigiissutissanut ilanngunneqarnissaat qulakkeerumallugu, isumaqatiginninniarnerit upernaaq aallartinneqannginnerini soqutigisaqaqatigiit tamarmik akuutinneqarput.

Ilaatigut kommuninut innuttaasumi pisariaqartitaannik kissaataannillu ilisimaarinninnerusunut angallanneq pillugu isumasioqatigiissitsinikkut kiisalu Inatsisartunut assinganik isumasioqatigiissitsinikkut peqataatitsisoqarpoq. Isumaqatigiissutissanut kommunit kissaataat Inatsisartut Sanaartornermut Ataatsimiititaliaanut aamma saqqummiunneqarput. Kissaatit saqqummiunneqarnissaanut partiit siulittaasui tamarmik aamma aggersarneqarnikuupput, upernaarlu manna nunatsinni borgmesterit tamakkerlugit ataatsimeeqatigineqarlutik.

Billetsinik inniminniisarnerup ajornannginnerulernissaa, atortussat nutaanngorsarneqarnissaat, atuilluartuunerunissarlu angullugit isumaqatigiissutissatut siunnersuut naammassineqarsinnaasimavoq.

Isumaqatigiissutissatut siunnersuut maanna Inatsisartut Aningaasaqarnermut Akileraartarnermullu Ataatsimiititaliaani suliarineqassaaq, ataatsimiititaliallu siunnersuut akuersissutigissappagu, isumaqatigiissutissat atsiorneqarsinnaalissallutik.

Tassanngaanniit isumaqatigiissutit nutaat aallaavigalugit 2021-mi angalanissanut billetsisisoqarsinnaalissaaq.

Ineqarnermut Attaveqaqatigiinnermullu Naalakkersuisoqarfimmut box909@nanoq.glimut saaffiginnissuteqarnikkut, paasissutissat annertunerusut pissarsiarineqarnissapput