Ilinniartitaanerup aaqqissuussaanera eqaatsoq ataqatigiittorlu pillugu innersuussutinik tunniussineq

Naalakkersuisut akuersissutigaat Ilinniartitaanerup aaqqissuussaanera eqaatsoq ataqatigiittorlu pillugu innersuussutit tunniunneqassasut. Taamaalilluni nalilersuinermik ineriartortitsinermillu suliniut sivisuumik ingerlanneqarsimasoq naammassivoq.

 

Naalakkersuisut ukiuni aqqaneq marlunni atuartitaasussaatitaanermik aaqqissueqqinnissaq sulissutiginianngilaat. Maannakkulli ukiuni qulini atuartitaasussaatitaaneq pigiinnarneqassaaq.

 

Naalakkersuisut isumaqatigaat siunissami suliniutit aallartinneqassasut aamma inerisarneqassasut innersuussutit sinneruttut aallaavigalugit. Eqikkarlugit ukuullutik:

 

-                     atuarfiup pitsaassusaanik kivitsineq

-                     inuusuttuaqqanut ilinniartitaanerit assigiinngitsut amerlanerulernissaat, atuartunik ilinniartunillu assigiinngitsunik amerlanerusunit ilinniarfigineqarsinnaanngorlugit

-                     ilitsersuisarnerup inerisarneratigut qulaajaanermik, tapersiinermik ilitsersuinermillu annertusaaneq

-                     ungasissumit atuartitseriaaseq iluaqutigalugu piffinni ilinniartitaanernik pitsaanerusunik neqerooruteqarsinnaanngorneq

-                     ilinniartitaanernik ingerlatseqatigiiffiit aqqutigalugit annertunerusumik suleqatigiinneq isumalluutinillu avitseqatigiinneq

 

Qulaani taaneqartut sakkugalugit maannakkut ilinniartitaanermi unammilligassat arlallit iluarsaqqinneqarsinnaapput, pingaartumik atuarfimmi pitsaassuseq aamma atuartut ikippallaat inuusuttuaqqanut ilinniartitaanernik aallartitsisarnerat naammassinnittarnerallu.  

 

”Innersuussutit tamarmiusut atuarlugit pissanganarput pitsaasunillu amerlasuunik siunnersuuteqarlutik. Siunnersuutini maluginiarneqassaaq misilittakkat ilinniartitaanermi assigiinngitsuneersut tusarnaarluarneqarsimasut. Suliniutit assigiinngitsut ilinniartitaanitsinni pitsaasumik inerititaqarnissaat qilanaaraara. Tamassi atuarluarnissamik kissaappassi.” Taamatut oqaaseqarpoq Ilinniartitaanermut, Kultureqarnermut Ilageeqarnermullu Naalakkersuisuugallartoq, Karl Frederik Danielsen.   

 

Innersuussutit Naalakkersuisullu isummernerannut allakkat nassuiaatitut peqataatinneqartut Naalakkersuisut nittartagaaniipput: https://naalakkersuisut.gl/~/media/Nanoq/Files/Attached%20Files/Uddannelse/DK/F%C3%B8lgebrev%20til%20Anbefalingerne%20dk.pdf.

 

Atuarluarisi.

 

Annertunerusumik paasisaqarusukkuit attavigisinnaavat naalakkersuisumut allatsi, Rosa Thorsen, rosath@nanoq.gl.