Peqqissaasut Kattuffiata tusagassiorfinnut nalunaarutaanut Peqqinnissaqarfimmi qullersat akissutaat

Nappasimasunik sulisunillu oqimaaqatigiissaakkamik eqqarsaatiginninneq

Peqinnissaq Pillugu Kattuffiit (PPK) coronamik tunillatsisinnaanerup pitsaalineqarnissaanik pisariaqartitsinermut tunngatillugu ernumassutaat, Peqqinnissaqarfimmi qullersat Peqqinnissaqarfiullu tamakkiisup paasilluinnarsinnaavaa. Peqqinnissaqarfimmi qullersat pisumi ilungersunartorsiorfiusumi oqimaaqatigiissaariniarsaripput. Illuatungaanik nappaatip nunatsinnut Peqqinnisaqarfimmullu eqqunneqannginnissaa, illuatungaanillu ingerlatat pingaarutillit inuttalernissaat.

Tamatuma peqatigisaanik atorfinerlaap, atorfeqavissullu feeriareerluni utertup, angerlarsimaannarnissamut maleruagassaasa assigiinnginnerat, nunatsinni nappaatip tuniluunnerata killilersimaarneqarnissaa pillugu iliuusissatut siunniussat pingaarnerit paasisimasaqarfiginngikkaanni, naapertuutinngitsutut isikkoqarsinnaanera akuersaarparputtaaq. Tamatumani Peqqinnissaqarfik politikkikkut anguniagassatut siunniussanut maleruaqqusanullu pingaarnernut, Namminersorlutik Oqartussanut suliffeqarfinnullu taassuma ataaniittunut pingaarnertut tunngaviusumillu aalajangersakkanik ersoqataallunilu malinnissaaq.

Immikkut akuersissuteqarneq immikkut naliliinermik tunngaveqarpoq
Kalaallit Nunaannut nunatsinnilu angalanermi piumasaqaatit pillugit nalunaarummi nr. 37, 29. september 2020-imeersumi, piumasaqaatinik avaqqussisinnaanermut immikkut akuerineqarsinnaanermut Nunatsinni Nakorsaaneqarfiup Peqqinnissaqarfik periarfissippaa. Immikkut akuersissuteqarnissat sioqqullugit nunatsinnut suliartorlutik angalasussat tamarmik, maleruagassanik eqquutitsisinnaanermut tunngatillugu, tamatigut naliliivigineqartarput. Atorfinerlaaq Peqqinnissaqarfiup suliami qiterisaanik isumaginnissinnaanissaanut pisarialittut naliliivigineqarpat, suliassap tamatuma isumagineqarnissaa qulakkeerniarlugu, maleruagassanik avaqqutsisinnaanermut immikkut akuersisoqarnissaanik tamanna isumaqarpoq. Naliliinerni ataasiakkaani pingaarnertut napparsimasut eqqarsaatigineqarnissaat ilaavoq, ataatsimullu naliliineq suleqatit eqqarsaatigineqarnissaannik tunngaveqarlunissaaq.

Sulisunut tikerlaanut maleruagassat immikkut ittut
Tamatuma saniatigut Peqqinnissaqarfik nunatsinnut suliartortunut angerlarsimaannarallarnissamullu maleruagassanik avaqutsinissamut immikkut akuerineqartunut, immikkut ittunik maleruagassiorpoq. Taamaalilluni sulisut taakku napparsimasunik attaveqarnerminni nalinginnaasumillu suliffimmi qanoq iliornissaat ersarippoq. Immikkut akuersissuteqarnerup sulinerup nalaannaani atuunnera ersaripportaaq.  

Innuttaasut peqqinnissakkut neqeroorutinut pingaarutilinnut periarfissaqassapput
Peqqinnissaqarfimmi sulilerlaat tamarmik ulluni tallimani angerlarsimaannartitaassagaluarpata tamanna nunatta immikkoortui pingaarutillit piffissat ilaanni peqqinnissakkut sullissisunik amigaateqalernissaannik kinguneqassaaq. Neqeroorutinut pingaarutilinnut periarfissaqannginnerup kingunerluutigisassaasa mianersornerpaaffimmilu tunillatsissinnaanerup oqimaaqatigiissaarnissaat, Peqqinnissaqarfimmi qullersat Peqqinnissaqarfiullu tamakkiisup suliassaraa.

 

Tusagassiorfinnut nalunaarut una pillugu apeqqutissat uunga saaffiginnissutaassapput: Sundhedsledelsen@peqqik.gl