EF-imut uppernarsaasiisarneq pillugu Suleqatigiissitap nalunaarusiaa

Aalisarnermut, Piniarnermut Nunalerinermullu Naalakkersuisoqarfik 2020-mi januaarimi suleqatigiissitamik, KANUAANA-p (Kalaallit Nunaanni Aalisarsinnaanermut Akuersissutinik Nakkutilliisoqarfiup) EF-imut uppernarsaasiisarneranik suliaqartussamik pilersitsivoq – tassa imaappoq pisanut uppernarsaatinik atuutilersitsineq, aalisakkanik tunisassianik nunanut allanut nioqquteqartut uppernarsaammik, unioqqutitsilluni aalisarnermit pisanut ilaanngitsut uppernarsarlugit, tunineqartarlutik.

 

Suleqatigiissitap, inuttaqartinneqartoq ukunannga Aalisarnermik, Piniarnermik Nunalerinermillu Naalakkersuisoqarfimmit, Nunatsinni Sulisitsisunit, Kalaallit Nunaanni Aalisarsinnaanermut Akuersissutinik Nakkutilliisoqarfimmit, Polar Seafoodimit aamma Royal Greenlandimit sinniisoqartoq, suliani maajip 26-anni 2020-mi naammassivaa. Suleqatigiissitap nalunaarusiamini suliani, inerniliinerit innersuussinerillu allaaserivai.

 

Suleqatigiissitap innersuussutai

 

Innersuussineq 1: Suleqatigiissitami isumaqatiipput iluseq 4 toqqarniarlugu, maannakkut aaqqissuussaq ingerlatiinnarneqarluni, kisianni raajat eqqarsaatigalugit pisat annertussusaat 48% assagiarsuillu 80% misissorneqartassasut allaffissornikkut aalajangerneqarluni. Aaqqissuussaq naliliiffigineqassaaq aaqqissuussarlu naammassisineqassallani nalunaarusiap matuma atsiorneraniit ukiut marluk qaangiuppata.

 

Innersuussineq 2: Nakkutilliinermi nalunaarummut siunnersuutigineqartup kapitalimi 10 §§ 43-miit 45-mut oqaasertaliorneri, imm. 4.3 naapertorlugu, suleqatigiissitami amerlanerussuteqartut innersuuppaat. Kapitali 10 pillugu isummernissaq ikinnerussuteqartut kissaatiginngilaat, tamanna nakkutilliinermut nalunaarutip siunnersuutigineqartup saqqummiunneqarnera peqatigitillugu.

 

Innersuussineq 3: Tunngavigisat pingaarnerit 2-miit 12-imut innersuunneqassasut suleqatigiissitami isumaqatigiissutigineqarpoq. Suleqatigiissitami amerlanerussuteqartut taamatut aamma innersuuppaat tunngavigisaq pingaarutilik nr. 1 imm. 6 naapertorlugu. Nr. 1 ikinnerussuteqartut innersuussutiginngilaat, aalisarneq pillugu ataatsimiititaliarsuup sulinerata ilaanut isummernissaq kissaatigineqanngimmat, aatsaalli inaarutaasumik nalunaarusiaq takkuppat.

 

Suliap ingerlaqqinnissaa

 

Suleqatigiissitamit nalunaarusiaq septembarip pingajuanni 2020-mi ataatsimiinnermi Naalakkersuisunut saqqummiunneqarpoq, nalunaarusiaq Naalakkersuisut tusaatissatut tigullugu.

 

Aaqqissuussap naliliiffigineqarnissaa pillugu Kalaallit Nunaanni Aalisarsinnaanermut Akuersissutinik Nakkutilliisoqarfiup suleqatigiissitami ilaasortat aggersarniarpai 2022-imi upernaakkut, isumaqatigiissutigineqartutut nalunaarusiap atsiorneqarneraniit ukiut marluk atuutereernerata kingorna.

 

Nalunaarusiaq kalaallisut atuarneqarsinnaavoq ataaniittoq toorneratigut:

https://naalakkersuisut.gl/~/media/Nanoq/Files/Attached%20Files/Fiskeri_Fangst_Landbrug/GL/2020/Rapport%20fra%20Arbejdsgruppen%20om%20EFcertificeringKal.pdf

 

 

Qallunaatuua:

https://naalakkersuisut.gl/~/media/Nanoq/Files/Attached%20Files/Fiskeri_Fangst_Landbrug/DK/2020/Rapport%20fra%20Arbejdsgruppen%20om%20EF-certificering%20DK.pdf

 

Attavissaq:

Iben Funch Døj (Grønlands Fiskerilicenskontrol)

iben@nanoq.gl

Toqq/direkte +299 34 50 00