2021-mut Aningaasanut inatsisissatut siunnersuut pillugu isumaqatiginninniarnerit tullissaat

2021-mut aningaasanut inatsisissatut siunnersuut pillugu isumaqatiginninniarnerit siulliit maanna naammassisimalerput. Partiit tamarmik aggersarneqartut takkupput, tassanilu ukiup tullianut aningaasanut inatsimmut kissaatiminnik saqqummiussipput.

 

”Ataatsimiinnerit eqqissisimasumik ingerlanneqarput, ataatsimiinnernilu partiit aningaasartuutissanut sipaarutissanullu kissaataat tusarnaarpakka”, Vittus Qujaukitsoq, Aningaasaqarnermut Naalakkersuisoq nassuiaavoq, imalu nangilluni:

 

Maanna partiit kissaataat suliaralugit aallartippavut, taamaaliornitsinnilu aningaasanut inatsimmik katiterinissarput siunertaralugu kissaatit sorliit assigiiaarnersut paasiniarlugit”.

 

Ukiut pingasuni oqimaaqatigiitsitsinissaq Naalakkersuisut isumaqatiginninniarnerni aallaavigaat, taamaalillunilu ukioq aningaasanut inatsiseqarfiusumi 2021-mi COVID-19-ip maanna atuunnera pissutigalugu amigartooruteqarnissaq naatsorsuutigineqarpoq.

 

Maanna partiit kissaataat amerlasuut naatsorsorneqaleruttorput, kingornalu isumaqatiginninniarnerit immikkoortuat tulleq aallartinneqassaaq. Tassani partiit tamarmik peqataanissaat naatsorsuutigineqarpoq, kisiannili Atassut Suleqatigiissitsisullu minillugit, taakku aallarniutaasumik oqaloqatigiinnerni piumasaqaatit avaqqunneqarsinnaanngitsunik akilerneqarsinnaanngitsunilli saqqummiussipput, soorluttaaq illuatungeriit isumaqatigiinngissutai pissutigalugit isumaqatiginninniarnissamut tunngavissartaqanngitsoq nalunaarutigalugu.

 

Attaveqarfissaq:

 

Martin Christiansen (Aningaasaqarnermut Naalakkersuisoqarfik)

Toqq/direkte 345213

MCHR@nanoq.gl