WiFive – Digitaliusuni naleqquttumik ileqqoqarneq pillugu atuartitsinermi atortussat

TDC Groupip, De Danske Skoleeleverip aamma Ilinniartitaanermut Aqutsisoqarfiup suleqatigiinnerannit digitaliusuni naleqquttumik ileqqoqarneq pillugu 7. klassit tungaannut atuartitsinermi atortussaqarnissaq qulakkeerneqarpoq.

Ilinniartitaanermut Aqutsisoqarfiup portali nutaaq, Kalaallit Nunaanni meeqqat atuarfianni atuartuusut digitaliusuni naleqquttumik ileqqoqarneq pillugu ilisimasaqarnissaannik qulakkeerinneqataaffiusussaq, pilersippaa.

Taamaalillutit illit ilinniartitsisutut atuartuutinnut ajornaatsumik akeqanngitsumillu atuartitsinermi atortussat modulinut sisamanut avinneqarsimasut naammassitissinnaalerpatit. WiFive tassaavoq atuartitsinermi atortussaq modulinut sisamanut avinneqarsimasoq aamma TDC Groupimit Danske Skoleeleverimiillu digitaliusuni ataqatigiilluarnissamut tunngatillugu ineriartortinneqarsimasoq.

Atuartut akulliit digitaliusutigut ataqatigiinnerisa nukittorsarnissaat matumani angorusunneqarpoq. Modulini makku sammineqarput: 1. Internetikkut qanoq attaveqaqatigiittoqartarpa? 2. Teknologiip tunuliaqutaa qanoq aaqqissugaava? 3. Internetimi qanoq pissusilersortoqassava? 4. Isumannaatsumik interneterneq.

Atuartitsinermi atortussat nuannarineqarluartut kalaallisut saqqummersissinnaagatsigit nuannaarutigaara, Kalaallit Nunaannimi atuartut taakku pigisariaqarpaat. Atortussat suliaralugillu misilerarsimavagut, taakkununngalu tunngatillugu nuannersuinnarnik tusartarsimavunga.

Qallunaatuui 12.000-erlutik aaneqarsimapput.” Esther Vyff, Danske Skoleeleverimi siulittaasuusoq, oqarpoq.

Portalip Kalaallit Nunaanni atulersinneqarneranut Ilinniartitaanermut Aqutsisoqarfiup pisortaa Simon Lennert ima oqaaseqarpoq: ”Internetip, mobilit, qarasaasiallu inuusuttut inuuneranni pingaarutilimmik inissisimanerisa nalaanniippugut, taamaattumik piffissaatillugu digitaliusutigut ileqqorissaarnissaannik ilinniartitsinissarput pingaaruteqarpoq. Atuartitsinermi atortussat allanngueqataallutillu atuarnerup nalaani ataqatigiilluarnermik atugarissaarnermillu pilersitseqataanissaat neriuutigaarput.” Portali akeqanngitsuuvoq, ilinniartitsisuniillu Kalaallit Nunaanniittunit tamanit wifive.dk-mut iserluni Kalaallit Nunaata erfalasua toorlugu akeqanngitsumik aaneqarsinnaalluni. Ilinniartitaanermut Aqutsisoqarfiup WiFive 2019-imi suleqatigilersimavaa periusissiamullu Atuarfik Digitaliusumut atatillugu digitaliusuni naleqquttumik ileqqoqarnissamik suliniut aallarnisarsimallugu.

Paasisaqarnerorusuttut IT-mik atuinermi siunnersortimut Ane-Kathrine Petersenimut akpe@nanoq.gl-imut allallutik attaveqarsinnaapput.