Kalaallit Nunaata Avannaani ullorissat anaanik Cape York-imit taaneqartumik nassaarneq tunniussinerlu

Ullorissap anaanik nassaarneq pillugu Nunatta Katersugaasivia Allagaateqarfialu ulloq 16. september 2019  ilisimatinneqarpoq tamatumalu kingorna ullorissap anaa nalilersorneqarluni aallartippoq, ullorissallu anaata Danmarkimi nuna tamakkerlugu katersugaasivissuarmi maannakkut toqqorsimasuutigineqarnissaa pillugu isumaqatigiissuteqartoqarluni.

 

Maannakkut suliami ullorissap anaa Thulep eqqaaneersoq 31,5 kg-mik oqimaassusilik suliarineqarsimanngitsoq aserorneqanngitsorlu pineqarpoq. Ullorissap anaata ullorissat anaannut Cape York-imit taaneqartumit, ullorissat anarpassuinut saviminiusunut Kalaallit Nunaata avannaanut ukiut tusindillit arlallit matuma siorna nakkarsimasunut aamma ukiut 650 millionit matuma siornatigut asteroidit marluk apornerisigut pisuusimassasoq ilimanarluinnartoq immikkut ilisimasallit nalilerpaat. Manna tikillugu apornermit ullorissap anai 321-t nassaarineqarsimapput, taamaalilluni ukiut 4500 millionit matuma siorna ullorissat anaasa qeqqi saviminiusut qanoq manngertissimassanersut misissuiffigissallugit periarfissaqalerpoq.

 

Kultureqarnermut Naalakkersuisuugallartoq, Karl Frederik Danielsen oqarpoq: ”Cape Yorkimit taaneqartumit ullorissap anaanik taama angitigisunik aserorneqanngitsunillu peqartarnera akuttuvoq, taamaammallu Casper B. Jensenip nunatsinni eriagisassat itsarnisat ilaannut katersanut asseqanngitsumik ilanngussineranut Naalakkersuisut aamma Nunatta Katersugaasivia Allagaateqarfialu qujamasungaarput. Casper B. Jensenip nammineq akilerlugu ukiuni arlalinni nassaarsioreerneratigut nassaartoqarsimavoq. Nammineerluni katersugaasiveqarneq pillugu inatsimmik eqqortitsinissani qulakkeerniarlugu immikkut suliniuteqarsimavoq suliallu nalaani piumassuseqarluni Nunatta Katersugaasivia Allagaateqarfialu suleqatigiinnaavissimallugu.”

 

Katersugaasiveqarneq pillugu Inatsisartut inatsisaanni nr. 8, 3. juni 2015-imeersumi § 30, Inatsisartut inatsisaatigut nr. 4, 12. juni 2019-imeersutigut allanngortinneqartoq naapertorlugu qaqutigoorluinnartunik piorsarsimassutsikkullu oqaluttuarisaanermut pingaaruteqarluinnartunik nassaartoqartillugu Naalakkersuisut nassaartoq akissarsisissinnaavaat. Tamanna pissaaq Nunatta Katersugaasivia Allagaateqarfialu oqaaseqaateqarneratigut.

 

”Nalinginnaasumik inatsisillu atuuttut naapertorlugit katersugaasivik attaviginagu nunatsinni eriagisassat pinngortitameersut aamma nunatsinni eriagisassat itsarnisat sumiiffimmi nassaarfimmiitiinnarneqartariaqarput. Pisumili matumani nassaarnermut tunngatillugu pisoq immikkut ittuusoq nassaartullu immikkut ittumik suliniuteqarnera pissutigalugu taanna akissarsinissamut tunngaviliisoq” taama Nunatta Katersugaasivianit Allagaateqarfianillu oqaaseqartoqarpoq.

 

Ullorissap anaa pillugu sukumiinerusumik paasisaqarniaraanni Nunatta Katersugaasivianut Allagaateqarfianullu saaffiginninnissaq innersuussutigineqarpoq.