Namminersorlutik Oqartussat sulisunik atuinerat pillugu misissueqqissaarneq

2019-imut Aningaasanut inatsimmik isumaqatigiissuteqarneq, kiisalu AIS2020-mut saqqummiussaq aallaavigalugit Namminersorlutik Oqartussani sulisoqarnermut immikkoortoq pillugu aningaasartuutinik misissueqqissaarnermik aallartitsinissaq aalajangerneqarpoq. Misissueqqissaarneq taanna maanna naammassivoq piffissarlu 2016 – 2018 misissuiffigineqarpoq. Misissueqqissaarneq ilaatigut pingaarnertut inerniliussanik tulliuttunik imaqarpoq:
  • Piffissami 2016-2018 qitiusumik allaffeqarfissuarmi sulisunut aningaasartuutit 50 mio. kr.-t missaannik qaffapput. Procentinngorlugu 15 procentit.
  • Ingammik aqutsisoqarfiit ukiumut procentinngorlugu annertunerpaamik qaffariarfiupput – tassa 8 procentingajannik, naalakkersuisoqarfiillu akerlianik inissisimapput, taakku piffissami tassani annertunerusumik amerleriarnermik nalaassiffiunngillat.
  • Aqutsisoqarfinni pilersinneqaqqammersuni sulisunik atuinerit qaffariarnerat, taakku annertusiartortumik suliassanik nammakkersorneqarnerannik, kiisalu ukioq kaajallallugu atorfiit siusinnersukkut suliffeqarfinnut ataasiakkaanut attuumassuteqartut manna naatsorsuinermut ilanngunneqartalernerannik patsiseqarput.
  • Qitiusumik allaffeqarfissuarmi napparsimanerit sulisullu taarseraannerat annertuginarpoq. Kingulleq ingammik peqqinnissaqarfimmut attuumassuteqarpoq.
  • Nalunaarusiaq naapertorlugu sulisoqarnermut aningaasartuutit qaffariarnerat, ilaatigut politikikkut ingerlatsisunit atorfilittanut kissaatit nutaanik atorfinitsitsinernik nassataqarnerannik patsiseqarpoq.
”Naalakkersuisut misissueqqissaarneq nuannaarutigaat, taannami aallaavigalugu siunissami Namminersorlutik Oqartussat allaffeqarfiata suliassanik isumatusaartumik aningaasaqarnikkullu pitsaanerusumik qanoq naammassinnissinnaanera piviusorsiortumik, paasissutissanillu toqqammaveqartumik oqallisigisinnaalerparput”, Aningaasaqarnermut Naalakkersuisoq Vittus Qujaukitsoq nassuiaavoq. Nangipporlu:”Nalunaarusiornikkut alloriarneq siulleq aallartipparput. Nalunaarusiallu kaammattuuterpassuisa piviusunngortinnissaat alloriarneq tulliussaaq. Taakku ilaat tassaavoq qanoq iliornikkut sulisorpassuit pikkorissut akisuumillu piginnaanngorsakkatta sulisoriinnarnissaannut pikkorinnerulernissarput, taamaaliornitsigummi suliat pitsaanerusumik naammassineqarnissaat assigiiaarnerusumillu ingerlatsineq isumannaassavarput”.

Nalunaarusiap kaammattuutai allat ilaatigut tassaapput napparsimaneq pissutigalugu sulinngitsoornerit annikinnerpaamiitinneqarnissaannut siunnersuut, sulinngitsoornerit naatsorsorneqartarnerannut periutsit pitsaanerusut, kiisalu sulisut nutaat pitsaanerusumik suliffimmi aallartittarnissaat.

Nalunaarusiaq Namminersorlutik Oqartussat sulisunut 2016-2018 aningaasartuutaat pillugit misissueqqissaarneq.

Inussiarnersumik inuulluaqqusillunga

Vittus Qujaukitsoq, Aningaasaqarnermut Naalakkersuisoq

Annertunerusumik paasissutissinneqarnissamut attaveqarfissaq, Martin Christiansen (Aningaasaqarnermut Naalakkersuisoqarfik)Toqq/direkte 345213 MCHR@nanoq.gl