Aaja C. Larsen-imut akissut

Asasara Aaja C. Larsen.

Sermitsiami ulloq oktoberip qulingiluaani saqqummersumi Kalaallit Nunaannut sukkanerusumik nunanit allanit sulisussarsiornermi fast-trackimik aaqqiissutip siuariartunnginneranut imminut illersuisunngortillutillu uanga inuttut akisussaasunngortipparma.

Nunatsinni suliffeqarfimmut aaqqiissutip taassuma pilersinnerata pingaarnerpaalluinnarnera isigigiga, taamalu immitsinnut tunngavissaqanngitsumik saassussisaqattaarnernut naleqqiullugu pingaarnipilussuunera isigigiga ilinnut sianigeqqussavara. Eqqorpoq aaqqiissut suli piviusunngortinneqanngimmat, aammalu Kalaallit Nunaannik aamma eqquisimasumik nunarsuarmi tuniluunnerup akiorniarlugu ilaatigut nunamut isernissamut sakkortuunik killilersuutit pissutigalugit suliarisatulli allarpassuartut aporfissaqalersimanera eqqorluni. Nalaataqarfiup tamakkivissortumik qaangerneqanngiffiani, taamaattorli aqutarineqarfiani uannut pingaarnerpaat tassaapput siumut isiginissaq, aammalu fast-trackimik aaqqiissutip sapinngisamik piaarnerpaamik pilersinniarnerani ingerlatilerneranilu suut tamaasa iliuuserineqassanerisa isumaginissaat, suliffeqarfiusoq eqqarsaatigalugu, aammalu inuiaqatigiit akuuffigisagut tamarmiusut eqqarsaatigalugit.

Ilaliullugu peqqinnissaqarfimmut fast-trackimik isumaqatigiissutissamut allaqqaakkamik piareersaatitut suliuniutinik – aallarniutigisatut – ulapputeqarluarnerput ilisimatitsissutigissavara, maannakkorpiarlu taassuma piviusunngortinnissaa sioqqullugu illua’tungerisat tamarmik akuersissuteqarnissaat utaqqivaa. Tamatuma saniatigut suliffeqarfimmi suliaqarfigisat sinnerinik tamatigoortumik isumaqatigiissutissaq pillugu illua’tungerisallu isumaqatiginninnialeruttorpugut, tassani maannakkut siunnersuutigisaat katersorneqarlutillu aaqqissuunneqarlutik.

Siuliani oqaatigineqareersutut atorfilittakka aamma suliassaqarfimmi oqartussaasoqarfimmik SIRI-mik isumaqatiginninniarput, tassani naalakkersuisoqarfiup tungaanit nunatta tungaanit fast-trackimik aaqqiissutip sunik imaqarnissaanik kissaateqarnitsinnik najoqqutassagut sorliit erseqqissaassutigisimallutigit. Inuiaqatigiinni annertuunik pingaarutilinnik pissutsinik illua’tungeriit arlallit akor-nanni isumaqatiginninniarnerni aaqqiissutip piareersarluarlugulu uppernarsaasersorlukkamik tunngaveqartumik piviusunngortinnissaa qulakkeerniarlugu isumaqatiginninnerup angunissaa pingaartuuvoq. Suliaqarnerput ingerlallualeruttorparput, taamaattumillu suliaq uangalu inuttut ajorinninnertut oqaaseqaatigisatit pisariaqanngilluinnarlutillu eqqunngitsuupput.

Avataaniit kikkulluunniit suaarutiginissaat oqittunnguuvoq. Tamatta kissaatigisatsinnik, aamma arlaannaataluunniit unikaallatsinnissaanik soqutigisaqarfiginngisaanik suliffeqarfimmut fast-trackimik isumaqatigiissummik pitsaasumik naammassinninniarneq tassaavoq oqittuunngitsoq.

Inussiarnersumik inuulluaqqusillunga

Jess Svane