Attaveqaatip nutaap Nunarsuarmi anguniakkat ukkatarai

Digitalimik attaveqaqatigiiffittut attaveqaatip nutaap, nunarsuarmi anguniakkat aamma Kalaallit Nunaanni piujuartitsilluni ineriartorneq paasissutissiivigissallugu ukkataraa. Ilisimasanik avitseqatigiinnernut nutaanik periarfissanik aamma nunap iluani soqutigisaqaqatigiit akornanni ataqatigiissarinissanut ammaavoq.

Aningaasaqarnermut Naalakkersuisoq Vittus Qujaukitsoq tallimanngornermi 9. oktober 2020 nal. 11 anguniakkavut.gl – nunarsuarmi anguniakkanut attaveqaat nutaaq atulersinneqartoq tusagassiorfinnut saqqummiuppaa. COVID19 peqqutigalugu taamaallaat tusagassiorfitsigut aamma atorfilittanut killilimmik pisoq ingerlanneqarpoq.

NP-p Nunarsuarmi anguniagai nunarsuaq tamakkerlugu piujuartitsilluni ineriartortitsinermut sinaakkusiipput aamma nunarsuaq tamakkerlugu saaffiginnipput.

”COVID19-imik ajornartoornerup ersarissisissimavaa ullumikkut nunarsuarmiooqataalluta inuusugut. Nunarsuarmi, ajornartorsiutit nunat killeqarfiinik ilisimasaqanngitsumi. Ajornartorsiutit pakkersimaarfigisinnaanissaannut aaqqiivigineqarnissaannullu suli ersarissigaluttuinnartumik suleqatigiinnissaq pisariaqartoq”, Aningaasaqarnermut Naalakkersuisoq Vittus Qujaukitsoq oqaaseqaateqarpoq.

Paasissutissiineq, allanik suleqateqarneq ilisimasanillu avitseqatigiinneq

Ingerlatitseqqinneq attaveqaqatigiinnerlu pisariaqartinneqarput. Kalaallit Nunaanni namminerisamik aaqqissuussani, inuussutissarsiortuni, sumiiffinni aamma kommuneqarfinni suli piujuartitsinissamik ineriartortitsinissaq pillugit eqqartueqatigiinnerit aamma suliniutit soqutiginartut nutaat takoreersimavagut. Naalakkersuisut ineriartorneq tamanna tapersersussallugu pingaartitaraat – pisariaqavipput – nunatsinni pisortaqarfiit, peqatigiiffiit aamma innuttaasut peqatigalugit akornannilu oqaloqatigiinnerit. Aalajangiiffissat ajornakusoortut piffissap qaninnerusup iluaqutissartaasa aamma piujuartitsinissamik ineriartortitsilluni piffissap ungasinnerusup akornanni aalajangigassat ataatsimoorussilluni paaseqatigiinnikkut aalajangerneqartariaqarput, aamma kinguaassavut ataqqillugit.

” Piujuartitsinermik eqqarsarnermi isummap ilagaa, ilungersornartut ataatsimoorluta periarfissatut nutaatut isigineqarnissaat. NP-p piujuartitsisumik ineriartortitsinermut nunarsuarmi anguniagaanut suliniutitsinnik ukkataqarnissatsinnut aamma nutaanik nuna tamakkerlugu, pisortaqarfinnik, peqatigiiffinnik il. il. suleqateqarnissatsinnut atortorissaarutaavoq pingaaruteqartoq” Naalakkersuisoq Vittus Qujaukitsoq nassuiaavoq nangillunilu:

”Tulluusimaarutigisorujussuuara nunarsuarmi anguniakkanut nunatsinni attaveqaat nutaaq anguniakkavut.gl ilisaritissinnaagakku. Neriuutigaara attaveqaat Nunatta nunarsuarmi anguniakkanik atulersitsinissamut suliaanut pingaarutilittut qitiujumaartoq aamma isumassarsisitsiviujumaartoq, siunissamilu ilisimasanik avitseqatigiinnissanut periarfissaajumaartoq.”

Kisitsisinnguineq aamma suussusersiutinik malittarinninneq


Attaveqaat nutaaq qallunaat aningaasaqarnermut inatsisaasa ilaannit aningaasaliiffigineqarsimavoq, Kalaallit Nunaata SDG 2030 suussusersiutinut kisitsisinnguinermi malittarinninnera tapersersorniarlugu. Attaveqaatip qulakkeerpaa maannakkut periarfissaalersoq nunarsuaq tamakkerlugu nunat uuttuutini qanoq ingerlanersut ersersissallugit – tassani SDG 2030 suussusersiutinik taaneqartumi.

Attaveqaat ingerlaavartumik SDG 2030 kisitsisinnguinernik inerisaavigineqassaaq, paasissutissat katersorneqartut nutaat ilutigalugit aamma pissarsiariuminartilerlugit.

Attaveqaatip nutaap imarisai

Attaveqaammiipput:
  • nunarsuarmi anguniakkanik ataasiakkaanik allaaserinninneq SDG 2030-mi kisitsisinik suliap siuariartorneranik pissarsiffiusinnaasoq,
  • Kalaallit Nunaanni SDG 2030 ullormut eqqartugassatut pisortaqarfinnit, suliffeqarfinnit aamma nammineq kajumissutsimik tunngavigalugu peqatigiiffinni suliniutit pillugit nutaarsiassat,
  • pisortatigoortumik kalaallisuunngortitat nutaat aamma SDG 2030 ilusilersuutit aaneqarnissaannut periarfissat,
  • SDG 2030 iliuusissamik ilisarititsinerit allarpassuillu.
Nunarsuarmi anguniakkanut attaveqaat ataani nittartagaq aqqutigalugu iserfigineqarsinnaavoq:

https://www.anguniakkavut.gl/kl

Tusagassiortunik katersortitsineq
Attaveqaatip nutaap saqqummiunneqarneranut atatillugu tallimanngorneq 9. oktober 2020 nal. 11.00-11.30 tusagassiortunik katersortitsisoqassaaq.

Attavissaq: Immikkoortortaqarfimmi pisortaq Thomas Gaarde Madsen. Aningaasaqarnermut Naalakkersuisoqarfik. thga@nanoq.gl. tlf. +299 588159.

Piujuartitsilluni ineriartornermut (SDG 2030 Iliuusissaq) nunarsuarmi anguniakkat pillugit piviusut:

NP ataatsimeersuarnerminni piujuartitsisumik ineriartorneq pillugu nunarsuarmiut anguniagassaat 17-it ulloq 25. september 2015-imi akuerivaat. Ineriartornermut anguniakkat 17-it taakku nunarsuarmut tamarmut tunngasuupput nunanullu tamanut atuullutik, angisuunut mikisunullu – akimasunut piitsunullu. Nunarsuaq tamakkerlugu isiginninneruvoq aamma nunarsuarmut tamarmut anguniagaavoq, nunarsuarmi anguniakkat nunat allat akornanni isumaqatigiissutaasimasunit allanit allaanerusoq.

2030-imut anguniagassat nutaat soorunami atituujullutillu qulequtarsiornerusuupput, aammali nunarsuarmioqatigiit anguniagassatut kissaataannut naleqqanik ersarissunik tunisillutik:

Naligiissitaaneq uani pineqarpoq, meeqqat pisinnaatitaaffii, tamanut ilinniarsinnaatitaaneq, inuiaqatigiinni eqqissisimaneq aamma inatsisitigut isumannaatsuuneq, imeq, nukissat, avatangiisit silalu, akiitsoqaleriartorneq, piujuaannartitsineq ineriartorneq ilanngullugu, nungutsaaliuisumik sillimmatinik atuineq, kulturikkut tamalikaassuseq, annertuumik nutarterisoqartillugu aamma inuussutissarsiornerit allanngornerini inooqatigiinnermi ataqatigiissinnaassuseq – tamarmik ullumikkut Nunatsinnut attuumassuteqarluartut.

Eqqarsariaatsit nutaat nunarsuarmi anguniagassanut malinnaapput: Piujuartitsineq aamma sivisuumik siumut eqqarsarsinnaaneq pisariaqarpoq ataavartussanik aaqqiiniarnernut aamma nunap pilersaarusiornerata ataqatigiinnissaanut, suleqatigiinnissaq pisariaqarluinnarmat suleqatigiiffiillu nutaat pilersinnissaat. Periarfissat assigiinngitsut aamma suliat akimorlugit tamatta assilissamik assigiikannermik takorluugaqarnissarput, ineriartornerullu aqqut suna atorlugu ingerlatinnissaanut. Ineriartortitsinissamut pikkorinnerulluta siunertalersuisinnaasariaqarpugut, nalilersortuarlugulu ornitaq eqqortoq ingerlavigineripput.

Iserfissaq nutaaq anguniakkavut.gl oqaatsit pingasut atorlugit iserfigineqarsinnaavoq, kalaallisut, tuluttut qallunaatullu.