Kalaallit Nunaata Biskopeqarfiani biskopi nutaaq

Oktoberip 7-iani qinersinermut ataatsimiititaliap Naalakkersuisunut nalunaarutigaa qinersinermi Paneeraq Siegstad Munk amerlanernit qinerneqartoq taamaammallu Kalaallit Nunaata Biskopeqarfiani taaneqartoq biskopitaarineqartussanngortoq.

Biskopimik qinersineq malittarisassat atuuttut, tassa Biskopimik qinersineq pillugu Namminersorlutik Oqartussat nalunaarutaat nr. 29  16. decemberi 2019-imeersoq malillugu ingerlanneqarpoq. Nalunaarummi allassimasutut qinersinermi aqutsisut tassaassasut qinersinermi ataatsimiitsitaliaq ukunannga inuttaaffigineqartoq: Naalakkersuisup Siulittaasoqarfiani pisortaq, ilaasortaq ataaseq kommuninit toqqagaq kiisalu Inatsisartut Allattoqarfiani allattaaneq imaluunniit taakkununnga taartaasut, Biskopeqarfiup allattoqarfiata allattaanermi suliassat qinersinermi suliarissavai. 

3. marts 2020 Naalakkersuisut nalunaarput, biskopimut qinersisoqartussanngortoq. Qinigassanngortittullu julip 7-iani kingusinnerpaamik qinnigassanngortinnertik nalunaarutigissagaat, juli-llu 22-iani biskopeqarfiup allattoqarfiata nalunaarutigaa  qinigassanngortittut sisamat qinersinermut ataatsimiititaliamit biskopimut qinersinissamut qinigassanngortittutut akuerineqartut. Septemberip 2-ni qinersisinnaatitaasut Kalaallit Nunaata biskopissaanik qinersipput, qinersinermilu amerlanerussuteqartut Paneeraq Siegstad Munk Kalaallit Nunaata Ilagiivisa ukiuni aggersuni ilusilersornissaa kissaatigaat. 

Paneeraq Siegstad Munk 43-nik ukioqarpoq Attuminngaanneersuulluni. 2001-imi Ilisimatusarfimmi teologimi bachelorinngorpoq, 2017-imi teologimi Københavns Universitetiani kandidatinngorniarnini naammassivaa. 2004-miilli Paneeraq Siegstad Munk kandidatimut atuarnini unitsikkallarlugu palasitut Kalaallit Nunaanni sulilerpoq. 2004-mi palasitut sulinissaminut akuerisaavoq, illoqarfinnilu assigiinngitsuni arlalinni palasiusarsimalluni 2017-imilu Provsteqarfik Kujataani provstinngorpoq. 

Ilageeqarnermut Naalakkersuisoq Karl Frederik Danielsen ima oqaaseqarpoq: ” Naalakkersuisut Paneeraq pilluaqqungaarpaat, Kalaallit Nunaannilu Ilagiit pillugit suleqatigiinnissaq ineriartortitseqataanermilu suleqatigiinnissaq qilanaaraat.”

Biskopi nutaaq atorfimmini 1. december 2020 atuutilissaaq, biskopitulli ivertitsinissaq pisarnermisut ingerlanneqarsinnaanngornissaata tungaanut kinguartinneqarpoq. 

Paasissutissat qinersinermut biskopinngortitsinissamullu tunngassuteqartut Biskopeqarfiup allattoqarfianut imaluunnit AC Fuldmægtigimut Line Hasselriis +299 345708 land@nanoq.gl –imut paasiniarneqarsinnaapput.