Avatangiisinut Aningaasaateqarfik qinnuteqarfigineqarnissaminut ammarpoq

Avatangiisinut Aningaasaateqarfimmiit suliassat, Kalaallit Nunaanni avatangiisinut iluaqutaasussat taperserneqartarput.
Inatsisartut 2018-imi ukiakkut Avatangiisinut Aningaasaateqarfik pilersinniarlugu aalajangerput. Avatangiisinut Aningaasaateqarfiup nuna tamakkerlugu avatangiisini pissutsinik pitsannguiniarluni suliat pingaarutillit tapersiiffigisarpai. Aningaasat suliniutinik nutaanik, mingutsitsinngitsunut allannguiniarnermi siuarsaataasinnaasunik misileraanermut atorneqartartussaapput.

2021-mi suut tapiiffigineqarnissaannut qinnuteqartoqasinnaava?
2020-mi ukununnga aningaasaliissutissanik qinnuteqartoqarsinnaavoq:
  • Eqqagassalerineq, nunami namminermi eqqagassalerinermi aaqqiissutissanik tunngavissiinissamut atortussanik pisiniarneq aamma sulisunik ilinniartitsineq pillugit kommunimi suliassat . Suliassanut taakkununnga katillugit 3,1 mio. koruunit immikkoortinneqarput.
  • Eqqiluisaarneq eqqakkanillu immikkoortiterinerusarnissaq, atoqqiineq imaluunniit eqqakkanik ataasiakkaanik naggorissaatissanngortitsisarneq pillugit suliassaq. Suliassanut taakkununnga katillugit 1 mio. koruunit immikkoortinneqarput.
  • Aalisakkanut qassutit/atortut qimaannakkat aamma aalisarfinni piniariartarfinnilu eqqiluitsuutitsinissaq pillugu suliassat. Suliassanut taakkununnga katillugit 1 mio. koruunit immikkoortinneqarput.
  • Suliassat innuttaasuni imaluunniit suliffeqarfinni isumalluutinik eqqumaffiginninnerulluni pissusilersortalernermik malitseqartussat.
    Suliassanut taakkununnga katillugit 500.000 koruunit immikkoortinneqarput.
Kikkut tapiiffigineqarnissamik qinnuteqarsinnaappat?
Avatangiisini suliassanut aningaasaliissutissat assersuutigalugu kommuninit, inuussutissarsiutinik ingerlataqartunit, atuaqatigiinnit inuinnarnillu qinnuteqarfigineqarsinnaapput.

Aningaasaleeqataanissaq piumasarineqarpa?
10.000 koruunit sinnerlugit qinnuteqaruit, minnerpaamik 25%-inik aningaasaleeqataanissat piumasarineqarpoq. 10.000 koruuninik taakkuluunniit inorlugit qinnuteqaruit, aningaasaleeqataanissat piumasaqaataanngilaq.

Qanoq ililluni tapiiffigineqarnissamik qinnuteqartoqarsinnaava?
Avatangiisinut Aningaasaateqarfik pillugu annertunerusumik atugaqarit, aammalu immersuiffissaq nassaariuk uani.

Avatangiisinut Aningaasaateqarfik Ilisimatusarnermut Avatangiisinullu Naalakkersuisoqarfimmit aqunneqarpoq.
Qinnuteqartup Ilisimatusarnermut Avatangiisinullu Naalakkersuisoqarfimmit tapiiffigineqarnissamik neriorsuummik tigusaqarnissani sioqqullugu aningaasartuutigisimasaanik utertitsinissamut Avatangiisinut Aningaasaateqarfik periarfissaqanngilaq.

Qaqugu qinnuteqarsinnaavunga?
Qinnuteqarnissamut killigitinneqarpoq 1. februar 2021.

Annertunerusumik paasisaqarusunnermi Ilisimatusarnermut Avatangiisinullu Naalakkersuisoqarfik attaveqarfigineqassaaq e-mail: pan@nanoq.gl