Suiaassutsikkut immikkoortitsineq nunatsinni ajornartorsiutaavoq inuiaqatigiinnilu allanngortoqassappat oqallisigineqartariaqarpoq

Peqqissutsimut Naligiissitaanermullu Naalakkersuisoq Anna Wangenheim-imiit

Suiaassutsikkut immikkoortitsineq maanna Danmarkimi nutaarsiassatigut oqallisigineqaleruttorpoq, tamannalu Kalaallit Nunaanni aamma aallartikkiartuaalerpoq. Nammineq tusarnikuusakka ilai makkuupput:

“Arnaavutit, tamakku naluatit”
“Allaffinniiginnarsinnaagaluarputit takujuminarlutillu”
“Angerlarsimaffinnii meeqqatit pingaarnerutittariaqaraluarpatit iganerlu isumagalugu”
“Aappaqartaraluarpit?”


Suiaassutsikkut immikkoortitsinerup ajornartorsiutaanera aamma nunatsinni atuuttoq taamaasillunga nammineq misilittagaraara.

Nuna tamakkerlugu aviisip Sermitsiaq (AG) nunami suliffeqarfiit misissuilluni apersorlugit naammasseqqammerpaa, tamanna naapertorlugu sullivimmi suleqatinut qaninniartarneq akulikitsoorpasinngilaq. Aviisit suiaassutsikkut immikkoortitsisarneq qaqilermassuk naligiissitaanermut Naalakkersuisutut suliassaqarfimmut akisussaasuusutut nuannaarutigaara.

Naligiissitaanermulli suliassaqarfimmi nunami angutinut arnanullu atugassanut toqqissisimanartunut naligiissunullu qanilliartorsinnaassagutta, ulluinnarni suiaassutsikkut immikkoortitsisarnerup akuerisaaginnarnera ajugaaffiginiarlugu sammisaq paqumigisaasoq oqallisigineqartassaaq.

Maani nunami politikkikkut oqaluuserisakkat, politikkip ukiorpassuarni angutinit aqunneqarnerusimaneranik sunnerneqarsimasinnaasarput. Tamannalu immaqa sunniuteqaqataasimasinnaavoq suiaassutsikkut immikkoortitsisarnerup ajornartorsiutaanerata naammaginartumik ukkatarineqarsimannginneranut, innimiilliornermi taamaattumi arnat eqqorneqarnerpaarpasittarmata. Peqatigitillugu angutinut sullivimmi qaninniartarnerit nalunaarutigineqanngitsunik peqarsinnaavoq, tamannalu taamaassinnaappat suli paqumigineqarnerulluni. Taamaattumik ajornartorsiutip annertussusaanik siammasinnerusumik qulaajaanissamut periarfissanik misissuerusuppunga.

Angutinik arnanillu naligiissitsineq pillugu inatsiseqarpugut. Tassani ilaatigut arnamut imaluunniit angummut innimiilliornissaq, matuma ataani kinguaassiutitigut innimmiilliorneq inerteqqutigineqarpoq. Tamannalu malinneqartussaavoq. Taamaattumik sullivimmi qaninniartarnermik ajornartorsiut oqallisigiinnassanngilarput, aammali oqariartuut suliffeqarfinni aqutsisunut akisussaasunut saaffiginnissutigineqassaaq, taamaasilluni inatsit malinneqassammat.

Aqutsisut akisussaaffigaat suliffimmi atugarliornermut pissutsit isumagissallugit, matuma ataani suiaassutsikkut immikkoortitsineq imaluunniit sullivimmi qaninniartarneq pinaveersaartittussaallugu. Tamanna ilaatigut pisinnaavoq sullivimmi qaninniartarneq pillugu ersarissumik politikkiliornikkut, sulinermi pissutsinik ingerlalluanngitsunik akerliliisinnaasumik.

Naligiissitaanermut Naalakkersuisutut immikkut pisinnaatitaaffittut isigaara, kinguaassiutitigut innimiilliortarneq kiisalu suiaassutsikkut ileqqut allat pillugit oqallinnermi peqataasinnaanera, naligiissitaaneq siuarsarniarlugu, taamaasilluni siunissami kikkuulluunniit– arnat imaluunniit angutit – suliffimmi pissutsit ingerlalluanngitsut pissutigalugit piginnaasaminnik tamakkiisumik atorluaanissaminnut akornuserneqassanngimmata.

/Anna Wangenheim