Naalakkersuisut tapiissutaasartut tamaasa misissussallugit aallartippaat

Tusagassiorfitsigut aalisariutinik piginnittut tapiissutinik tunineqartarneri pillugit oqallisaasorujussuuvoq, tamannalu tunngavigalugu Naalakkersuisut Aalisarnermut, Piniarnermut Nunalerinermullu Naalakkersuisoqarfiup ingerlatsineranit tapiissutaasartut tamaasa misissuiffigissallugit aallartitsipput.

Ingerlatsineq pillugu misissuinermi suliakkiutitut tunngavigineqartussaq maannakkut suliarineqarpoq.

Neriuppunga pineqartoq suliarineqalerpat tapiissuteqartitsisarnermi piviusut tunngavigalugit misissuisoqassasoq, inatsisillu siunertai aamma tunngavigineqassasut. Inuit ataasiakkaat tapiissutinik tunineqartarsimaneri pillugit ukkassinissaq peqqunanngeqaaq, soorlu tusagassiuutini tamanna eqqaaneqaqqajaasartoq.

Tapiissutit assigiinngitsunik siunertaqartarmata, inatsisillu aamma assiginngitsut tunngavigineqartarmata allaffissornikkut suliarineqartarneri assigiinneq ajorput. Soorlu aamma qinnuteqartut naalakkersuinermik suliaqartuuneri suliaqannginnerilu apeqqutaatinneqarneq ajortut. Malittarisassat aalajangiinermilu tunngavigineqartut tamarmik assigiimmik pineqartarput.

Aalisarnermut, Piniarnermut Nunalerinermullu tapiissutigineqartartut tamaasa politikikkut akisussaaffigaakka, ilisimavaralu aaqqissuussinerit assigiinngitsut tunngavigalugit inuussutissarsiutinut attuumassuteqaqqissaartunik tapiissuteqartoqartartoq, nunatsinni innuttaasorpassuarnut iluaqutaasarlutik.

 

Inussiarnersumik inuulluaqqusillunga

Jens Immanuelsen,

Aalisarnermut, Piniarnermut Nunalerinermullu Naalakkersuisoq

 

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl