Peqqinnissaq Pillugu Ataatsimiititaliarsuup siullermeerluni ataatsimiinnera naammassisoq

Peqqinnissaq Pillugu Ataatsimiititaliarsuaq sapaatip akunnerata naanerani septemberip 26-ni 27-nilu iluatsilluartumik siullermeerluni ataatsimiippoq.

Peqqinnissaq Pillugu Ataatsimiititaliarsuup poliitikkikkut anguniagassai naatsorsuutigineqartut saqqummiullugit, Peqqinnissamut Naalakkersuisoq Anna Wangenheim programmi malillugu ammaalluni tikilluaqqussummik oqalugiarpoq.

Taassuma saniatigut Kalaallit Nunaanni Innuttaasut Peqqissusaannik Ilisimatusarfimmit nunatsinni peqqissutsimik misissuinerit, ilisimatusarnikkullu paasisat kingulliit saqqummiunneqarput, Nunatsinni Nakorsaaneqarfimmit nunatsinni peqqissutsip killiffia pillugu saqqummiussisoqarpoq kiisalu Peqqinnissamut Aqutsisoqarfimmit peqinnissaqarfimmi sinaakkutarineqartut suliassanillu naammassinninniartarneq pillugit saqqummiussisoqarluni.

Peqqinnissaq Pillugu Ataatsimiititaliarsuup siulersuisua Ulrik Bildorf ima oqaaseqarpoq:

”Sapaatip akunnerata naanerani ataatsimiinnermi pissarsiarineqartut iluarisimaarpakka. Ataatsimiititaliami piumassusilinnik suliamillu ineriartortitsisumik ingerlatitseqqissinnaalluartunik amigaateqanngitsugut ersarippoq. 2020-p qaammataani siullerni pingasuni Peqqinnissaq Pillugu Ataatsimiititaliarsuup sulinissaa aallartittussaasimagaluarpoq, Corona-virusilli siaruatsaalineqarnerani killilersuineq peqqutigalugu kinguartinneqarsimalluni. Ataatsimiinnermi siullermi ilaasortat pingasut peqataasussarlu ataaseq elektroniskimik peqataammata kinguneri ataatsimiititaliami malugivagut. Qujanartumik IT atorlugu pitsaasumik aaqqiissuteqarluta ataatsimiinnerit ingerlassinnaasimavagut…”

Nangipporlu:
”Suliakkiissut malitassarput naapertorlugu piffissaliunneqartoq qaangerneqareersoq paasilertorsimavarput. Taamaattumillu tamatuma eqqartornissaa pillugu Naalakkersuisut saaffiginissaat pilersaarutigaarput.”

Paasissutissat sukumiinerusut pillugit saaffissaq: Peqqinnissaq Pillugu Ataatsimiititaliarsuarmi siulersuisoq Ulrik Bildorf, blidorf@inuitlaw.gl imlt. tlf: 523622