2020-p sinneranut ikiorsiissutinut atuuttutut malittarisassiat

COVID-19-imut attuumassutilittut sinerissap qanittuani aalisarnermut ikiorsiissutit aallartisarneri, aamma immikkut ittunut ikiorsiissutit, takornariartitsinermillu inuussutissarsiorfimmi suliarisanut ikiorsiissutit sivitsorneri Naalakkersuisut ulloq 14. septembari 2020-mi tamanut saqqummiuppaat. Malittarisassiat atuuttut tamanut saqqummiunneqassapput.

Sinerissap qanittuani aalisarnermut ikiorsiissutit
Aalisarnermut ikiorsiissutit aqqutigalugit nuna tamakkerlugu tunitsiviit Naalakkersuisunut allaffissornermut isumaqatigiissutinik atsiorsinnaapput, taamaalillutillu aalajangersimasatut najoqqutassatut piffissap iluani tunisinermut akigititat minnerpaamik 15 pct.-inik appariarnerannik misigisaqartunut inuutissarsiutigalugu aalisartunut tapiissutinik akiliuteqarnissamut periarfissaqalerlutik.

Inuutissarsiutigalugu aalisartunut raajanik sikulersukkanik, saattuanik saarullinnillu tunisisunut tapiissutit akiliutigineqarsinnaapput.

Tapiissutit annertussusiat najoqqutassatut piffissami tunisinermut akigitaasup 10 pct.-ia tikissinnaavaa.

Immikkut ittumik aamma takornariartitsinermik inuussutissarsiuteqartunut ikiorsiissutit sivitsorneri
Immikkut ittumik aammalu takornariartitsinermik inuussutissarsiuteqartunut ikiorsiissutit sivitsornissaat Naalakkersuisut aalajangersimapput, taakkuami COVID-19-p ajornartoortitsinerata kingunerisaanik takornariaqarnerup iluani kaalluarneqangaatsiartumut ikiorsiissutaammata.

Immikkut ittumik ikiorsiissutinik sivitsuinerup ilaatigut takornariartitsinermik aamma akunnittarfeqarnermik inuussutissarsiorfiit qaammatini pingasuni kaaviiaartitanut annaasanut, aammalu aningaasartuutit aalajangersimasut matussusernissaannut taarsiissutissanik qinnuteqarsinnaanissaat periarfissaalerpoq.

Takornariartitsinermik inuussutissarsiuteqartunut ikiorsiissutit sivitsornerisigut akunnittarfiit aamma takornariartitsinermik suliaqartut il.il., COVID-19-imut unnuisarnernut imaluunniit takornarianik angalaartitsinernut akikilliliisut COVID-19-imut akikilliliissutigisaminnik 2020-p sinnerani Namminersorlutik Oqartussanit taarsiissutinik pissarsiaqarsinnaanerannik nassataqarput.

Ikiorsiissutit 30. septembari 2020-mi atorunnaartussat
Suliffeqarnermut ikiorsiissutit aamallu inuussutissarsiornerup iluanut ikiorsiissutit kiisalu angalanerulernissamut ikiorsiissutit septembarip 30-at 2020 atorunnaassapput. Suliffeqarnermut aammalu inuussutissarsiornermi ikiorsiissutini malittarisasanik aaqqissuussineqqinneq peqqutigalugu, ikiorsiissuutinik 30. novembari ilanngullugu qinnuteqartoqarsinnaavoq, qaammatimmi marluk kingulliit iluanni pisimasut qinnutigineqarsinnaalermata.

Aaqqiissutinut malittarisassiat pillugit annertunermik uani atuarit: www.big.gl, malittarisassiat atuuttut aamma tassani nassaarineqarsinnaapput.

Sukumiinerusumik paasisaqaruttut Inuussutissarsiornermut Suliffeqarnermullu Naalakkersuisoqarfik saaffigineqarsinnaavoq, isiin@nanoq.gl