Aalisartup Maniitsumeersup kapisilik nalunaaqutsigaq akissarsissutigivaa

Maniitsumi inuussutissarsiutigalugu aalisartoq Poul Zeeb NASCO-p kapisilimmik meqqilikkamik pisaqarsimasunut akissarsissutigineqartartoq, ippassaq oktobarip aallaqqaataani 2020-mi 1.500 US dollarit, koruunit 9.500-it akissarsissutigivai.

Maniitsumi aalisartup Karl Lyberthip, Aalisarnermut, Piniarnermut Nunalerinermullu Naalakkersuisuusimasup, Aalisarnermut, Piniarnermut Nunalerinermullu Naalakkersuisoq Jens Immanuelsen sinnerlugu, Maniitsup kommuniata ataatsimiittarfiani akissarsissutigineqartoq allagartalik tunniuppaa.

Poul Zeebip kapisilik Maniitsup kujataata kangiani septembarip 25-anni 2019-imi pisarivaa. Kapisilik kuummi Hunt Riverimi Labradorimi, Maniitsumit 1.000 kilometerinik ungasitsigisumi aggustip 27-anni 2017-imi meqqilerneqarsimavoq.

Poul Zeeb kapisilimmik meqqilimmik 2020-mi kisiartaalluni nassitsisuuvoq, taamaalilluni akissarsitinneqarluni. Amerlasuunik meqqinik nassitsisoqarsimatillugu nalinginnaasuuvoq makitsisoqartarluni.

NASCO
NASCO tassaavoq nunat naalakkersuisuisa suleqatigiiffiat, kapisilinnik Atlantikup avannarpasissuaniittunik peqartuaannarnissaanik suliniaqatigiiffiat, kapisileqatigiit qularnaatsumik aqutsinikkut piujuaannaqqullugit suliniaqatigiiffiusoq.

NASCO-p Atlantikup avannarpasissuani kapisileqartuarnissaanik suliaqarnerminut ilanngussimavaa kapisillit nalunaaqutsersortarlugit. Suliniaqatigiiffiullu tamaani najugallit kajumissaarpai kapisilinnik nalunaaqutalinnik siumugaqarsimagunik, taakku nassiuttassagaat sumi qangalu pisaasimaneri ilanngullugit ilisimatitsissutigineqartassasut. Taamaalilluni kapisillit nuuttarneri tamatumuunakkut ilisimasaqarfiginerulissammata.

APNN-ip kajumissaarutigivaa nunatsinni kinaluunniit nalunaaqutalimmik kapisilittoq, pisarisami nalunaaqutaa Pinngortitaleriffimmut nassiussinnaavaa. Pinngortitaleriffiup nalunaaqutaq NASCO-mut nassiuttarpaa, suliniaqatigiiffillu ukiut tamaasa ataatsimiinnermini nalunaaquttanik nassiunneqarsimasunik makitsisarpoq, makinneqartoq 1.500 dollarsinik aningaasartalinnik akissarsisinneqartarluni.

Aappaagu juunimi nassitsisimasunik makitsisoqassaaq. Kapisilimmik meqqilimmik aappaagu pisaqarsimaguit, nalunaaqutsiunneqarsimasoq Pinngortitaleriffimmut nassiutissavat ilisimatitsissutigalugulu qanga sumilu pisarisimanerlugu. Nassiunneqartoq Pinngortitaleriffiup NASCO-llu kapisillit pillugit ilisimatusarnerminnut mikinngitsumik iluaqutigissavaat, kapisileqassutsitsinnut iluaqutaassalluni aalisarneqarnerinullu.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi siunnersortaaneq Katrine Kjærgaard. E-mail: katk@nanoq.gl