Meeqqat ornittagaat nutaaq kommunini tamani ammarneqassapput

Kommunini tamani meeqqanut inuusuttunullu 18-it inorlugit ukiulinnut aningaasarsiffiit nalaanni sapaatit akunnerisa naaneranni unnukkut unnuakkullu qimarnguivigineqarsinnaasut orniguttarfiit oktobarimi ammarneqassapput. Orniguttarfiit sulisoqartinneqartut isumassuinermik, inersimasumik akisussaassuseqartumik oqaloqateqarnissamik, nerisaqarnissamik unnuinissamillu neqerooruteqassapput.

Meeqqat inuusuttullu atugarliortut amerlavallaat inersimasumit isumaginnittussaarussinnaasarput angerlarsimaffimmiissinnaajunnaarlutilluunniit. Pingaartumik unnukkut unnuakkullu meeqqat inuusuttullu aarlerinartumiittarput angajoqqaallu erngunneranni kinguaassiutitigut kannguttaatsuliorfigineqaratarsinnaallutik, paarinerlunneqaratarsinnaallutik allatigulluunniit sumiginnarneqarlutik.

Meeqqat inuusuttullu ornittagassaannik kommunit ujartuisimapput NAKUUSA-milu meeqqat inuusuttullu ataatsimeersuarneranni angerlarsimaffik najugassaajunnaaraangat orninneqarsinnaasumik ujartuisimallutik.

Taamaammat Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinnerat aqqutigalugu meeqqat ornittagaat tallimat – kommunini tamani ataaseq – misiligummik massakkut pilersinneqarput.

”Meeraq inuusuttorlu kinaluunniit angerlarsimaffimmi toqqissisimannginnini pissutigalugu aqqusinermi asuli angalaassanngilaq. Taamaammat kommunini meeqqat ornittagaannik pilersitsineq pingaaruteqarpoq. Iliuuseqarnitsigut meeqqatta inuusuttortattalu nipaannik pingaartitsinerput tusarnaarnerpullu takutikkatsigu nuannaarutigaara,” Isumaginninnermut, Ilaqutariinnut Inatsisinillu Atuutsitsinermut Naalakkersuisoq, Martha Abelsen, oqarpoq.

Meeqqat ornittagaat aningaasarsiffiit nalaanni sapaatit akunnerisa naaneranni unnukkut unnuakkullu siullermik ammasassapput. Meeqqat inuusuttullu 18-it inorlugit ukiullit tassanngaannartumik isumannaatsumiinnissamillu pisariaqartitsisut tamarmik tikilluaqqusaapput. Orniguttarfiliarniaraanni misissuiffigineqarsimanissaq kommunemulluunniit saaffiginneqqaarsimanissaq piumasaqaataanngilaq.

2020 oktobarimiit 2023 decembarip tungaanut meeqqat ornittagaat misiligutitut kommuninit ingerlanneqassapput.

Ikiortariaqartunut
Meeqqat ornittagaat ilinnit ilisarisimasannilluunniit sapaatit akunnerisa naaneranni unnukkut unnuakkullu angerlarsimaffik toqqissisimananngikkaangat orninneqarsinnaapput. Orniguttarfiliarniaraanni misissuiffigineqarsimanissaq kommunemulluunniit saaffiginneqqaarsimanissaq piumasaqaataanngilaq.

Paasisaqarnerunissamut attavigineqassaaq naalakkersuisup allattaa Inger Heilmann Larsen, e-mail: ihla@nanoq.gl imaluunniit oqa. + 299 554160.