Kalaallit Airportsip siulersuisuisa siulittaasuat tunuarpoq

Siulersuisuni siulittaasoq Johannus Egholm Hansen Kalaallit Airports Holding A/S-imi, Kalaallit Airports International A/S-imi aamma Kalaallit Airports Domestic A/S-imi siulersuisunit 30. september 2020-mit tunuassasoq pillugu Naalakkersuisut Siulittaasuata Naalakkersuisoqarfia ajoraluartumik ilisimatinneqarpoq.

Siulersuisuni siulittaasoq illuatungeriit isumaqatigiinneratigut tunuarpoq.

Johannus Egholm Hansen Kalaallit Airports A/S-imi marts 2017-imi siulersuisunngorpoq, taamaattumillu ukiut sisamassaat qiteqqullugu Kalaallit Nunaannut iluaqutaangaarsimavoq Nuummi, Ilulissani Qaqortumilu mittarfittaarnissamut Inatsisartut aalajangiussaata naammassinissaanut ikiuussimalluni.

Ingerlatseqatigiiffiup siulittaasuata tulliata Christian Bergip siulersuisut sullillugit Kalaallit Airports Holding A/S-imi, Kalaallit Airports International A/S-imi aamma Kalaallit Airports Domestic A/S-imi suliassat tullinnguuttut nangikkallassavai. Christian Berg Danmarkimeersuuvoq ukiorpaalunnilu Danmarkimi Sverigemilu mittarfiit pillugit suliniutinik suliniutinilu allani annertuuni misilittagaqarpoq. Ullumikkut Sønderborg Lufthavnimi pisortatut sulivoq.

Nuummi Ilulissanilu mittarfiliornissamut suliat Qaqortumilu mittarfiliornissamut pilersaarutit naammassinissaat allanngoratik nanginneqassapput.

Naalakkersuisut Siulittaasuata Naalakkersuisoqarfiata mittarfiit pillugit suliniutinut piareersarnermut aallartitsinermullu atatillugu Johannus Egholm Hansen qanimut suleqatigilluarsimavaa taamaattumillu Naalakkersuisoqarfiup ingerlariaqqilluarnissaanut ajunnginnerpaamik kissaappaa suleqatigisimaneranullu qujaffigalugu.

Allanik paasisaqarniaruit: Lars Balslev, immikkoortortaqarfimmi pisortaq, Siulersuisunut allatseqarfik, tlf. 52 27 77