Peqqinnartumik utoqqaliartorneq

Naalagaaffiit Peqatigiit nunani tamalaani utoqqarnut ullorititaat Naalakkersuisunit ukiut tamaasa malunnartinniarneqartarpoq. 2020-mi peqqinnartumik utoqqaliartorneq sammisarissallugu ukkatarisassallugulu Naalagaaffiit Peqatigiit toqqarsimavaat.

Naalagaaffiit Peqatigiit nunani tamalaani utoqqarnut ullorititaat ukiut tamaasa 1. oktobari malunnartinniarneqartarpoq. Malunnartitsineq atorlugu nunatsinni utoqqaat amerliartornerat Naalakkersuisut ukkatariniarpaat, tamanna utoqqarnut nalinginnaasumik atugassarititaasut pitsanngorsimanerisa takussutissaavoq.

Utoqqaat peqqinnartumik peqqillutillu inuuneqarnissaat kiisalu ilaquttanik ikinngutinillu peqateqarnissaat Naalakkersuisut sulissutigaat. Utoqqaat paaqqutarineqarnissaminnut peqqinnissamikkullu ikiortariaqalersinnaasut amerlanerulernerisa saniatigut suliffeqarfeqarfimmiittut siunissami ikinnerulertussaanerat pissutigalugu tamanna massakkut immikkut eqqaassallugu naleqquttuuvoq.

”Utoqqarnut suliassaqarfimmi pissutsit nutaat isigisariaqarpagut. Ukiualuit qaangiuppata utoqqaat aatsaat taamak amerlatigilissapput. Utoqqartatta peqqinnartumik utoqqaliartorlutillu pitsaasumik inuuneqarnissaat pillugu tamatta qulakkeerinneqataanissarput pingaaruteqarpoq. Utoqqaat amerliartornerannut sapinngisarput tamaat piareersarnissarput aamma pingaaruteqarpoq.”
Isumaginninnermut, Ilaqutariinnut Inatsisinillu Atuutsitsinermut Naalakkersuisoq Martha Abelsen oqarpoq, nangillunilu ”pitsaasumik inuuneqarneq utoqqalinersiat amerlassussaannut taamaallaat tunngassuteqanngilaq, kisiannili aamma ineqarnikkut atukkanut kiisalu paarineqarnissamut isumassorneqarnissamullu neqeroorutinut tunngassuteqarluni. Tamanna utoqqaat pillugit periusissiami 2021-imi Naalakkersuisunit saqqummiunniarlugu sulissutigineqartumi ersersinneqassaaq”.

Utoqqaat pillugit Naalakkersuisut periusissiassaat suliarineqaleruttorpoq sulinermilu kommunit utoqqaallu illersuisuat peqataatinneqassapput.

Utoqqaat pillugit periusissiaq piffissamut ungasinnerusumut ukkatarinnissaaq, taannalu innuttaaqatitsinnut utoqqanngortunut ullumikkumut naleqquttunik inuunerminni atugassaqartinnissaannik akuersaartuussaaq, tamatumalu peqatigisaanik utoqqaat paarineqarnissaasa, peqqinnissaqarfimmit neqerooruteqarfiginissaasa, ineqarnerilu il.il. pillugit qulakkeerinninnissaq pillugu pisortat unammilligassaannut sammiviliissalluni.

Inuuniarnikkut atugassarititaasut pillugit pitsanngorsaateqalilereerpugut.

Utoqqalinersiat pillugit malittarisassani utoqqalinersiat ikiliartortilinnginneranni utoqqaat isertitaqarnerusinnaanerat periarfissiissutigineqareerpoq. Utoqqaat peqqissut sivisunerusumik sulisinnaanerannut taamalu utoqqalinersialittut pitsaanerusumik aningaasaqarsinnaanerannut allanngortitsineq tapersiivoq.

Sisimiuni Maniitsumilu puigortunngortunut immikkoortunut marlunnut 4,4 mio. kr.-it 2020-mi Aningaasanut Inatsimmi immikkoortinneqarsimapput. Puigortunngortut amerliartornerat pillugu akuersinermut immikkullu ittumik katsorsarneqarnissamik qulakkeerinninnissamut, puigortunngortunut immikkoortut atorneqassapput.

Kalaallit Nunaanni innuttaasut tamarmik utoqqalinissaminnut ileqqaarnissaat, taamalu utoqqalinersiaqalerunik aningaasaqarnikkut atugarissaarnerunissaat qulakkeerniarlugu utoqqalinersianut ileqqaartussaatitaaneq Naalakkersuisut atulersippaat.

Utoqqaat atukkatik pillugit inuiaqatigiinnilu ineriartorneq pillugu oqalliseqataanissaat utoqqaallu illersuisuannik oqaloqateqarnissaat Naalakkersuisut naggataatigut innersuussutigaat.

Sukumiinerusumik paasissutissat pillugit naalakkersuisup allattaa attavigineqarsinnaavoq, Inger Heilmann Larsen e-mailikkut: ihla@nanoq.gl imaluunniit oqarasuaatikkut + 299 554160