Ittoqqortoormiini qernertanik qilalugartassiissutit tamakkerneqarput

Ittoqqortoormiini qilalukkat qernertartassat 40-t tamakkerneqarput, taamaasillunilu ukioq manna Ittoqqortoormiini qernertarniarneq matuneqarpoq.

Aalisarnermut, Piniarnermut Nunalerinermullu Naalakkersuisoqarfiup (APNN) Aqutsiveqarfik Ittoqqortoormiiniit qilalukkanik qernertanik pisarineqarsimasunit nalunaarutinik 32-nik tigusaqarsimavoq, pisarineqarsimasuni 36-iusuni. 2019-imi arfineq pingasunik sippuisoqarsimanera aamma ukioq manna qilalukkanik qernertanik sisamanik sippuisoqarsimavoq.

Qilalukkanik qaqortanik qernertanillu illersuineq piniarnerlu pillugu Namminersorlutik Oqartussat nalunaarutaat nr. 3 27. januar 2017-imeersoq § 6, imm. 3 naapertorlugu Naalakkersuisut ukiumi pisassiiffiusumi tulliuttumi kommunimut pisassiissutinik appaasinnaasut, qilalukkanik qernertanik aqutsiveqarfimmi unioqqutitsisumik piniartoqartoq paasineqarpat. § 7, imm. 3 naapertorlugu akuersissut ataaseq ukiumi pisassiiffiusumit ataatsimit akuersissutip aqutsiveqarfimmi tunniunneqarfiani qilalukkamik ataatsimik pisaqarnissamut periarfissiivoq.

Qulaani taaneqartut isumaqarput 2020-mi pisassiissutit nalimmassarneqareersut aamma naatsorsuutigineqassasoq 2021-mi pisassiissutissat 2020-mi pisaasimasunut nalimmassarneqarsinnaasut, sisamanik sippuisoqarsimanera naapertorlugu.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl