Akiliinissamut piffissaliussaq kinguartinneqarpoq

Soraarnerussutisiaqalernissamut aaqqissuussinermut peqataasussaatitaanermi 2019-imut tunngatillugu akiliinissamut piffissaliussaq Akileraartarnermut Aqutsisoqarfiup 9. oktober 2020-mut sivitsorpaa.

Taamak aalajangernerup kinguneraa, innuttaasut 2019-imi ileqqaarnissamut pisussaaffimminnik suli naammassinnissimanngikkunik, aningaasat amigaataasut soraarnerussutisiassaminnut kingusinnerpaamik ulloq 9. oktober 2020-mi akilerunikkik tamanna angumerisinnaagaat.

Piffissaliussamik sivitsuinermut pissutaavoq innuttaasut amerlasuut soraarnerussutisiaqalernissamut aaqqissuussinermut peqataasussaatitaaneq pillugu ukiumoortumik naatsorsuut ima kingusitsigisumik tigusimammassuk, allaat aningaasat 2019-imut akiliinikippallaarutaasimajunnartut akilernissaannut naammaginartumik piffissaqarsimanatik. Innuttaasut amerlanerusut inatsisip siunertaanik malinnillutik nammineq soraarninngornissaminnut ileqqaarnissaat Akileraartarnermut Aqutsisoqarfiup piffissaliussamik sivitsuinermigut qulakkeerniarpaa.

Uppernarsaatinut piumasaqaatit siusinnerusukkut piffissaliunneqartumi piumasaqaataasut assigaat. Nassiullugillu uppernarsagassaraatit:

1. Soraarnerussutisiaqalernissamut aaqqissuussinermut akiliisimaneq illit nammineq akiliinerisimassavat imaluunniit allap, ass. sulisitsisuit, illit sinnerlutit akiliinerisimassavaa
2. Akiliineq soraarnerussutisiaqalernissamut aaqqissuussinermut inatsimmi pineqartumut akiliutaasimassaaq:
a. Kalaallit Nunaanni; SISA, Grønlandsbanken aamma Bank Nordik Nuuk
b. Danmarkimi; soraarnerussutisiaqalernissamut sillimmasiisarfiit aamma soraarnerussutisiaqalernissamut aningaasaateqarfiit (aningaaserivinnili ileqqaakkat pineqanngillat)
3. Ulloq soraarnerussutisiaqalernissamut aaqqissuussinermut akiliiffik
4. Ukioq ileqqaarfigisat aammalu aningaasat soraarnerussutisiassanut akilikkavit kisitsisitaat eqqortoq

Uppernarsaatinut piumasaqaatit sisamat tamaasa eqquutsinngikkukkit, akiliineq 2019-mut akiliinertut isigineqarani ukiumut 2020-mut akiliinertut isigineqassaaq.

Paasissutissat
  • Soraarnerussutisiaqarnissamut aaqqissuussinermut peqataasussaatitaaneq pillugu inatsit 2018-imi atuutilerpoq.
  • Akissarsiortut 2019-imi aningaasarsiamik 5%-ii ileqqaartussaavaat. Namminersorlutik inuussutissarsiummik ingerlataqartut 3%-it ileqqaartussaavaat.
  • Suliffillit amerlanerpaartaat sulisitsisortik aqqutigalugu namminerluunniit isumagalugu soraarnerussutisiaqalernissaminnut ileqqaagaqareerput.
  • Paasissutissat amerlanerusut uani takusinnaavatit www.aka.gl/kl-GL/borger/pension
Innuttaasut qulaani allassimasut pillugit apeqqutissaqarunik
Attavissaavoq: Akileraartarnermut Aqutsisoqarfik, Intaleeqqap Aqqutaa 1, Postboks 1605, 3900 Nuuk, tlf. + 299 34 65 00, mail: tax@nanoq.gl

Tusagassiortut qulaani allassimasut pillugit apeqqutissaqarunik
Attavissaavoq Søren Würtz, Akileraartarnermut Aqutsisoqarfik, oqar. + 299 34 65 79, mail: sowu@nanoq.gl.