Nalunaarut nutaaq – suut eqqumaffigissavigit

Danmarkimi nunanilu tamalaani inuit tunillatsissimasut amerliartorput, taamaattumik Naalakkersuisut Kalaallit Nunaanni aamma Kalaallit Nunaannut angalasunut nalunaarut nutaaq akuersisutigeqqammerpaat. Tassani nalunaarut atuussimasoq tunngavigineqarpoq aammalu tunillaassuinissamut akiuiniarnermi sakkussat annertusineqarlutik.

Tikinnermi angerlarsimaannarnissap eqquteqqinneqarnera
Danmarkimi tuniluunnerup annertoorujussuunera peqqutigalugu angerlarsimaannarnissamut maleruagassat siornatigut atuussimasut atuutsinneqaleqqipput. Tassalu Kalaallit Nunaannut tikittut ulluni 14-ini angerlarsimaannartussaapput imaluunniit tikinnermiit ullut tallimat qaangiunnerini kingusinnerusukkulluunniit misissorteqqittussaallutik.

Angerlarsimaannarnissaq pillugu www.nun.gl-imi annertunerusumik atuagaqarsinnaavutit

Illoqarfinnut nunaqarfinnullu ingerlaqqittarneq
Angalanermi illoqarfimmut nunaqarfimmulluunniit matuma kinguliani allassimanngitsunut ingerlaqqittoqassappat, tikinnermiit ullut tallimat qaangiunnerini kingusinnerusukkulluunniit misissorteqqittoqareertinnagu ingerlaqqittoqassanngilaq. Aatsaat apuuffissamut ingerlaqqittoqarsinnaavoq, COVID-19-imik tunillatsissimannginnermut uppernarsaat tiguneqarpat.

1) Avannaata Kommuniani:
a) Ilulissat

2) Kommune Qeqertalimmi:
a) Aasiaat
b) Qasigiannguit
c) Qeqertarsuaq

3) Qeqqata Kommuniani:
a) Kangerlussuaq
b) Maniitsoq
c) Sisimiut

4) Kommuneqarfik Sermersuumi:
a) Nuuk
b) Paamiut

5) Kommune Kujallermi:
a) Narsaq
b) Narsarsuaq
c) Qaqortoq

Tikittut tamarmik COVID-19-imik tunillatsissimannginnermut uppernarsaammik peqassapput
Siornatigut atuussimasuniit allannguutit annersaattut tikittussat tamarmik – qanorluunniit ukioqaraluarunik – Kastrupip Mittarfiani tunniussinermi COVID-19-imik tunillatsissimannginnermut uppernarsaammik, annerpaamik ullunik tallimanik pisoqaassusilimmik takutitsisussaapput.
Aalajangersakkami tassani piffissamik ikaarsaarfiusumik aalajangiisoqarpoq, taamaalilluni meeqqat 12-it inorlugit ukiullit aamma misissortittarnissaat aatsaat 7. oktober 2020-mi atuutilissalluni.

Anersaartuutinut illersuutit
Aamma kiinnamut assiaqutit anersaartuutinullu illersuutit sumi qaqugulu atorneqassanersut erseqqissarneqarpoq. Meeqqat 12-it ukioqalereersimasut timmisartumilu sulisut tamarmik anersaartuutinut illersuutinik aamma/imaluunniit kiinnamut assiaqutinik atuisussaapput, tassani ikittuinnaat pineqaratik. Tamanna maanna timmisartunut ilaanernut tamanut, nunap iluani angalanerit ilanngullugit atuuttussanngorpoq, taamatullu mittarfinniinnermi terminaleqarfinniinnermilu kiinnamut assiaqutit atorneqartussaapput. Meeqqat 12-it inorlugit ukiullit ilaatinneqanngillat.

Sulisut terminaleqarfinni assigisaannilu ilaasussanut attaveqartut aamma, sulisup angalasussallu akornanni plastikkimik assiaqusiisoqarsimanngippat anersaartuutinut illersuutinik kiinnamulluunniit assiaqutinik atuisussaapput.
Nalunaarut nutaaq unnuap qeqqaniit atuutilissaaq, aammalu pingasunngornermi septembarip ulluisa 30-anniit angalasunut tamanut atuutilissalluni. Piffissami ikaarsaarfiusumi meeqqanut tunngasoq oktobarip ulluisa arfineq aappaata tungaanut atuutissaaq.