Uumassusillit assigiinngisitaartut pillugit nunarsuarmi isumaqatigiissut Naalakkersuisut tapersersorpaat

Nunarsuarmi uumassusillit assigiinngisitaartut pillugit isumaqatigiissusiortoqarnissaanik sulissuteqarneq Naalakkersuisunit tapersersorneqarpoq. Isumaqatigiissut nunarsuarmi immap nunallu 30 %-iisa piujuaannartitsisinerusumik aqunneqalernikkut illlersorneqarnissaannik ilaatigut imaqarpoq.

Nunarsuarmi uumassusillit assigiinngisitaarnerat ajornartorsiorpoq. Naasut uumasullu peqatigiiaat amerlasuut nunarsuarmi ikiliartorput peqatigiiaanillu nunarsuarmi annaasaqartarneq sukkavallaarujussuarpoq.

”- Nunarsuarmi pissutsit ilungersunarput. Nunat allat peqatigalugit nunarsuarmi isumaqatigiissuteqarnikkut pinngortitamut pissarititaanullu piujuaannartitsinerusumik periuseqarnissamut Naalakkersuisut qulakkeerinneqataarusupput”.

”- Uumassusillit assigiinngisitaartut pillugit Kalaallit Nunaanni inuusuttunut workshop-ertitseqqammernerput nuannaarutigaara. Naalakkersuisut uumassusillit assigiinngisitaartut pillugit periusissiassaannut inuusuttut tunniussaat arlaqartut atussavagut, nunarsuarmilu uumassusillit assigiinngisitaartut pillugit isumaqatigiissutissamut inuusuttut ilassutaasa tusarneqarnissaat aamma qulakkiissavarput”, Suliffeqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

Immikkut ilisimasallit naliliipput nunarsuarmi pissuseqatigiiaat nalinginnaasumit uuttuuttit 100-mit 1000-imut amerlanerusut ullutsinni annaaneqartartut. Uumasut naasullu toqorarlutik nungupput nungoratarsinnaallutilluunniit, pingaarnertut nunarsuarmi pinngortitamik inuit piiaanerat pissutigalugu. Pissuseqatigiiaat uumaffissaqanngikkunik tammassapput. Immikkut ilisimasallit naliliipput ineriartorneq massakkutut ingerlaannarpat nunarsuarmi pissuseqatigiiaat 25 %-iisa missaat ukiut 100-t marlussuit ingerlaneranni annaaneqassasut.

”- Uumassusillit assigiinngisitaartut pillugit inuusuttut workshop-ertinneqarnerat ammarlugu oqalugiarama oqarpunga nunarsuarmi ataatsimoorluta – kinguaariit politikkikkullu isummertaatsit akimorlugit – nunarsuarmi ajornartorsiutigut aaqqiissuteqarfigissagigut. Nunarsuarmi uumassusillit assigiinngisitaartut pillugit angusaqarluarnissamik siunertaqarnissamut oqaloqatigiinnernut aalajangersaanernullu Kalaallit Nunaata peqataanissaa pingaaruteqartoq isumaqarpunga”, Naalakkersuisoq Jess Svane naggasiivoq.

Uumassusillit assigiinngisitaartut pillugit nunarsuarmi isumaqatigiissut
Uumassusillit Assigiinngisitaarnerat pillugu isumaqatigiissutip ataani Naalagaaffiit Peqatigiinni peqataasut ataatsimeersuarneranni (COP15) nunarsuarmi nunat uumassusillit assigiinngisitaarnerat pillugu nunarsuarmi isumaqatigiissutissamik isumaqatigiinniassapput. Ataatsimeersuarneq Kina-mi Kunming-imi 2021-imi ingerlanneqarnissaa naatsorsuutigineqarpoq. Nunarsuarmi uumassusillit assigiinngisitaarnerisa pitsaanerusumik illersorneqarnissaannik isumaqatigiissut qulakkeerinnissaaq.

Uumassusillit assigiinngisitaarnerat pillugu inuusuttunut workshop
Uumassusillit assigiinngisitaarnerannik illersuisunik inuusuttunik Naalakkersuisoq Jess Svane uumassusillit assigiinngisitaarnerat pillugu Nuummi marlunngornermi 22. septembari 2020-mi workshop-ertitsivoq.

Uumassusillit assigiinngisitaarnerat suua?

Uumassusillit assigiinngisitaarnerat tassaavoq nunarsuarmi uumassusillit tamarmik, nunami immaanilu uumasut, naasut, pupiit, bakteerissat inuussusillillu allat ilanngullugit.

Attavissaq
Paasisaqarnerorusuttut attavigisinnaavaat Ilisimatusarnermut Avatangiisinullu Naalakkersuisoqarfimmi pisortaaneq Mette Skarregaard Pedersen oqarasuaat: 346476 / 529844, e-mail: mesp@nanoq.gl imaluunniit pan@nanoq.gl.