Nallukattat nutaat atorlugit meeqqat eqqakkat pillugit ilinniartinneqassapput

Meeqqat inuusuttullu maannakkut eqqakkat pillugit nallukattanik imminnut unammisinnaalerput. Pinngortitami eqqaasannginnissarput eqqakkat pillugit nallukattani ukkatarineqassaaq.

”Eqqakkat pillugit nallukattani siunertaavoq, eqqakkat ajornartorsiutaanerat, aammalu qanoq iliorluta tamatta pinngortitamik paarseqataasinnaanersugut, pillugit nuannersumik meeqqat inuusuttullu soqutiginninnerulersinnissaat ilisimasaqarnerulersinnissaallu. Eqqakkat asimut iginneqartut tammaannarneq ajortut takutissallugu pingaaruteqarpoq,” oqarpoq Suliffeqarnermut, Ilisimatusarnermut Avatangiisinullu Naalakkersuisoq.

Meeqqat inuusuttullu eqqakkat pillugit nallukattarlutik unamminerminni peqatigisaanik eqqakkat assigiinngitsut pinngortitami qanoq sivisutigisumik nungujartortarnersut, eqqakkat uumasunut qanoq navianartiginersut, eqqakkat atoqqinneqarunik qanoq naleqarnersut il.il. pillugit ilikkagaqarnerusassapput.

Eqqakkat pillugit nallukattat nunarput tamakkerlugu atuarfinnut tamanut nassiunneqassapput. Paaqqinnittarfiit allat assigisaallu soqutiginnittut Ilisimatusarnermut Avatangiisinullu Naalakkersuisoqarfimmut saaffiginninnermikkut nallukattanik pisinnaassapput.

Nallukattat Pinngortitap Paarsisui pillugit paasititsiniaanermut ilaapput, taannalu uani paasisaqarfiginerusinnaavat www.inua.gl. Nallukattat Danmarks Naturfredningsforening-imi atuarfinnut kiffartuussisartunit sananeqaqqaarsimapput aammalu inussiarnersumik Ilisimatusarnermut Avatangiisinullu Naalakkersuisoqarfimmut ingerlateqqinneqarsimallutik, tassani ineriartorteqqinneqarlutik.

Paasisaqarnerorusukkuit attavigisinnaavat:
Paninnguaq Kristiansen, Ilisimatusarnermut Avatangiisinullu Naalakkersuisoqarfimmi immikkoortortami pisortaq, tlf. 345416 imaluunniit e-mail: pan@nanoq.gl.