Kim Kielsen-ip biilii pillugit ilanngutassiaq pillugu KNR-mut akissut

Tusagassiorluarnissap malinneqannginnera

Isornartorsiuisumik tusagassiortoqarnera ajunngilluinnarpoq, kisianni KNR-ip pissusiviusut eqqortumik takutinnagit, tamanut saqqummiussinissaq Inatsisartut ataatsimiilivinnerannut pisussanngortissimammagu, tamanna uukapaatitsiniarsarinertut isigineqartariaqarpoq, tusagassiorluarnissamut tunngaviusunut akerliulluinnartoq.

- Allagaatinik takunninnissamut atatillugu KNR-ip paasissutissat ukioq ataasingajak tigummereerpai. KNR-ip taakkua ulloq Inatsisartut ataatsimiinnerannik ammaanissaq eqqorlugu saqqummiutissallugit aalajangersimammat, tamanna piaaraluni eqqunngitsunik paasissutissiiniarsarinertut imaluunniit uukapaatitsiniarsarinertut ittumik iliuuseqarniarsarinertut isigineqaannarsinnaavoq, oqarpoq Kim Kielsen, nangillunilu – Politikkeriunerma nalaani tusagassiuutitigut taama annertutigisumik uukapaatitsiniarsarisoqartoq siornatigut takunikuunngisaannarpara.

KNR ulloq 27. novembari allagaatinik takunninnissamik qinnuteqarpoq, ulloq 3. januar 2020 paasissutissat ukiunut qulinut tungnasut KNR-imut tunniunneqarput. KNR assersuutigalugu ullumikkut allappoq: ”Tamanna KNR-p allagaatinik naalakkersuisut siulittaasuata naalakkersuisoqarfianut noqqaassutaani takuneqarsinnaavoq.”, allannagulu allagaatinik takunninnissamik 3. januar 2020-imili akissutisisimallutik.

Ilanngutassiami paasinarsisinniarsarineqarpoq paasissutissat KNR-imit tiguneqarsimasut nutaajusut kiisalu atuineq isertuunneqarsimasoq imaluunniit kukkunerusoq.

Naatsorsukkani ilanngunneqartuni allassimavoq Naalaakkersuisut Siulittaasuata biiliinut, maleruagassat malillugit atugassiissutigineqartunut, atuinermi ilaatinneqartut sillimmasiinerit, akitsuutit, aserfallatsaaliuineq kiisalu benziinamik atuineq.

Ilanngutassiaq, ulloq taanna tamanut saqqummiunneqartussanngortinneqarsimanerata saniatigut, peqatigisaanik kukkuneqarpoq aammalu eqqunngitsunik tunngaveqartumik suliarineqarsimalluni. Ilanngutassiami allassimavoq Naalakkersuisut Siulittaasuata Kim Kielsen-ip biiliinut atuineq ukiuni tallimani kingullerni 700.000 koruuningajannik annertussuseqarsimasoq. KNR-ip allakkiat eqqortumik atuarsimagunigit, Kim Kielsen-ip atuinera ukiuni tallimani kingullerni 362.142-inik annertussuseqarsimasoq takusinnaasimassagaluarpaa sillimmasiinerit, akitsuutit, aserfallatsaaliuineq kiisalu benziinamik atuineq (takukkit naatsorsukkat ilanngunneqartut).

- Pissusiviusut eqqortumik takutinnagit, KNR-ip taama sakkortutigisumik pisuutitsiniarnera isornartoqarluinnarpoq. Tamannalu tusagassiorluarnissamik ersarilluinnartumik malinninnginneruvoq, naggasiilluni Kim Kielsen oqarpoq.

Annertunerusumik paasisaqarusunnermi saaffigineqarsinnaavoq Naalakkersuisut Siulittaasuata Naalakkersuisoqarfia pisortaq Simigaq Broberg oqa +299 34 51 44, mail sbro@nanoq.gl