Angalanissat pisariaqanngitsut tamarmik pinaveersaarneqassapput

COVID-19-ip Danmarkimi tuniluunnerata annertusiartornera ingerlaannarpoq – taamaattumik suliffeqarfiit, oqartussaasut innuttaasullu nuna qimallugu pisariaqanngitsumik angalanissanik pinngitsuuinissaannik maanna Namminersorlutik Oqartussat inassuteqaateqarput.

Tallimanngormat danskit kommuniannit, inuit 100.000-iugaangata inunnik 30-nik nutaamik tunillatsissimasoqarfiusumit tikittussanut Namminersorlutik Oqatussat inassutineqarput:
- tikinnermiit ullut tallimat qaangiunnerini misissorteqqissasut, aamma
- COVID-19-imik tunillatsissimannginnermik uppernarsarneqarsinnaalernissaata tungaanut inunnut qanillisaqarnaveersaassasut, aammalu inuit akornanni aaqqissuussinernut ornigutissanngilluinnassasut
www.ssi.dk/covid19data iserfigalugu kommunit suut inuit 100.000-iugaangata nutaanik 30-inik tunillatsiffiusimanersut takuneqarsinnaavoq.
Ullumi sisamanngornermi Namminersorlutik Oqartussat nutaamik nunatsinniit angalasussanut innersuussuteqarput.

Kalaallit Nunaanniit Kalaallit Nunaannullu angalanissat pisariaqanngitsut tamarmik pinaveersaarneqassapput
COVID-19 nunatsinnut angalasut aqqutigalugit Kalaallit Nunaannut tikittussaavoq, aammalu piffissap angalanerpaaffiusup qaangiunnerani innuttaasut Kalaallit Nunaanni najugallit, sulinerminnut atatillugu sulinngiffeqarlutilluunniit angalasimasut tikittarput.
Taamaattumik maanna suliffeqarfiit, oqartussaasut innuttaasullu pisariaqanngitsumik angalassanngitsut Namminersorlutik Oqartussanit innassutigineqarpoq.

Pisariaqanngitsumik angalanerit suuppat?
- Sulinngiffeqarnermut atatillugu angalanerit
- Sulinermut atatillugu angalanerit pisariaqarluinnanngitsut
- Sulinermut atatillugu angalanerit, siunertaasumik oqarasuaatikkut imaluunniit videokkut ataatsimeeqateqarnikkut naammassineqarsinnaasut
Angalanissamik aalajangiinissaq innuttaasut, suliffeqarfiit oqartussaasullu ataasiakkaat aalajangigassaraat.

Tikittut pillugit nalunaarut
Tallimanngormat septembarip ulluisa 18-ianni oqaatigineqartutut aamma tikittut pillugit nalunaarut suliarineqarpoq. Tassani tikinnermi angerlarsimaannartarnerup misissorteqqittarnerullu atuutsinneqaqqilernissaat eqqarsaatigineqarpoq. Nalunaarutip sapaatit akunnerata tulliani saqqummiunneqarsinnaanissaa naatsorsuutigineqarpoq.

Peqqissutsimik suliallit siunnersuutaat eqqaamasigit
- Qanillinaveersaarit
- Assammiinerit eqitaarinerillu pinaveersaakkit
- Assannut quersornak
- Errortorluartarit