Pisortani Digitalimik Allakkerineq 1. januar 2021 aallarnerfigalugu pinngitsoorani tamanut atuutilissaaq

Ulloq 1. januar 2021 aallarnerfigalugu innuttaasut tamarmik 15-ileereersimasut pisortani oqartussaasunit pingaarutilinnik allagarsianik pissarsisassagamik digitalimik allakkerivimmi takusarnissaanut pisussaaffeqalissapput. Maannangaaq NemID atorlugu e-Boksimut isersinnaavutit elektronikkikkullu allakkeriviit qanoq atorneqartarnersoq sungiusarlugu.

e-Boksi NemID atorlugu ammaruk
e-Boksimut iserniaruit NemID atussavat, siullermik www.e-boks.dk ammariarlugu imaluunniit e-Boksimut app’eq smartphonikkut aariarlugu ilitsersuutit malissavatit. Aamma e-Boksip qanoq atornissaanut ilitsersuut sullissivik.gl-imi takuneqarsinnaavoq. NemID-mik peqanngikkuit kommunimi, bankimi imaluunniit nemid.nu-mi pissarsiniarsinnaavutit.

Digitalimik Allagarsianik pissarsisarnissamut pisussaajunnaarsinneqassaguit
Innuttaasut ilaasa e-Boksi iserfigisinnaanngilaat, taamaattumik pisussaajunnaarsinneqassapput. Taakku allagarsiassat pisarnertut tigusassavaat. Illit taakkununnga ilaaguit, imaluunniit ilaqutaqaruit imaluunniit ikinnguteqaruit pisussaajunnaarsinneqartariaqartumik, innuttaasunik kiffartuussivimmut saaffiginnissaatit. Inuit ukiui malillugit qinnuteqarnissamut killiliussaqartoq maluginiassavat.

Ukiut malillugi pisussaajunnaarsinneqarnissamut qinnuteqarnermi killiliussat
Utoqqaat pisussaajunnaarsinneqarnissaannut pitsaanerpaamik malittarisassaqartitsiniarneq qulakkerniarlugu, aamma pisussaajunnaarsitsinissap malitsigisaanik allaffissornikkut atukkat sulisunut pitsaanerpaatinniarlugit, inuit ukiui malillugit qinnuteqarnissamut killiliussaqarnissaq aalajangiunneqarpoq. Imalu agguataarneqarput:

1) Ulloq 1. januar 2021-mi 30-t ataallugit ukiulinnut qinnuteqarnissamut killiliussaavoq 31. oktober 2020
2) Ulloq 1. januar 2021-mi 50-it ataallugit ukiulinnut qinnuteqarnissamut killiliussaavoq 30. november 2020
3) Ulloq 1. januar 2021-mi 70-t ataallugit ukiulinnut qinnuteqarnissamut killiliussaavoq 31. december 2020

Paasissutissat
Pisortani Digitalimik Allakkerineq pillugu paasissutissat allat atuarsinnaavatit uani

Pisortani Digitalimik Allakkerineq pillugu siusinnerusukkut nutaarsiassaq

Pisortani Digitalimik Allakkerineq pillugu Inatsisartut inatsisaat nr. 14, 8. juni 2017-imeersoq

Pisortani Digitalimik Allakkerinermut ilanngunnermit inunnik pisussaajunnaarsitsineq pillugu Namminersorlutik Oqartussat nalunaarutaat nr. 34, 23. september 2020-meersoq


Paasissutissat
Innuttaasut Pisortani Digitalimik Allakkerinermut pinngitsoorani ilanngunnissaat siullermik ulloq 1. april 2020-mi pisussaatinneqaraluarpoq. COVID-19 pissutaalluni ulloq kinguartinneqarpoq. Innuttaasut Pisortani Digitalimik Allakkerinermut pinngitsooratik ilanngunnissaat Naalakkersuisunit aalajangiunneqarpoq, ullorlu pissaaq 1. januar 2021.

Paasissutissanik allanik pissarsiniaraanni, Digitalimik Sullissinermut Aqutsisoqarfimmi pisortaq, Katrine Hjelholt Nathanielsen, oqarasuaatikkut +299 34 59 70-imut sianerluni imaluunniit e-mailikkut digitalpost@nanoq.gl.-imut allalluni pissarsiarineqarsinnaavoq.