Innuttaasut peqqinnerulernissaannut pilersaarut nutaaq Naalakkersuisut saqqummiuppaat

Inuuneritta III 2020-2030 ullumi Naalakkersuisut saqqummiuppaat. Inuuneritta tassaavoq Naalakkersuisut innuttaasut inuunerinnerulernissaannut suliniutaat meeqqallu inuunerinnerulernissaannut suleqatigiinnissamut periusissiaat. Inuuneritta III aqqutigalugu nunami meeqqat tamarmik inuunerisa pitsaasumik peqqinnartumillu aallartissinnaanissaat Naalakkersuisunit ukkatarineqarpoq.
Meeqqat inuunerinnerulernissaasa kommuninik innuttaasunillu oqaloqateqarlunilu suleqateqarnikkut pilersinneqarnissaat suliniummi nutaartaavoq.

Najukkani inuiaqatigiit peqataatinneqassapput

Inuuneritta III aqqutigalugu meeqqat inuunerissut pillugit oqaloqatigiinnissamut suleqatigiinnissamullu Naalakkersuisut qaaqqusipput. Inuunerinneq ataatsimoorluta pilersissagipput Inuuneritta III-mi tunngavigineqarpoq. Najukkani suut kissaatigineqarnersut, suut pingaaruteqarnersut suullu piviusunngortinneqarsinnaanersut pillugit oqaloqatigiinneq aqqutigalugu Inuuneritta III-mi suliniutit taamaammat inerisarneqassapput. Iliuuserineqartut najukkani inuiaqatigiinni atuuttussaapput. Iliuuserineqartunut piujuaannartitsisumillu aaqqiissutinut najukkani piginnittuunissaq qulakkeerniarlugu najukkani inuiaqatigiit peqataatinneqarnissaat taamaammat pingaaruteqartorujussuuvoq.

Inuuneritta III anguniakkanik iliuusissanillu aalajangersimasunik ineriikkanik aaqqiissuteqanngilaq. Naleqqat sisamat sulinermik aqqutissiuissapput.

Innuttaasut akornanni peqqinnerunissap atugarissaarnerunissallu iluini ilorraap tungaanut allannguisoqassappat, oqartussaasoqarfiit assigiinngitsunik suliallit akornanni, sapinngisamillu innuttaasunut qaninnerpaamik suleqatigilluarlugit iliuuserisassat inerisarlugillu atuutilersinneqartariaqartut, ukiuni qulinit 15-it tikillugit peqqissutsimik siuarsaarnermik suliaqarnermi misilittakkat ersarissumik takutippaat.

Siammasissumik suleqatigiinneq

Inuuneritta III Isumaginninnermut, Ilaqutariinnermut Inatsisinillu Atuutsitsinermut Naalakkersuisoqarfiup, Peqqissutsimut Naalakkersuisoqarfiup kiisalu Ilinniartitaanermut, Kultureqarnermut Ilageeqarnermullu Naalakkersuisoqarfiup siammasissumik suleqatigiinnerisigut ineriartortinneqarsimavoq.

Meeqqat tamarmik pitsaasumik peqqinnartumillu inuuneqarlutik aallartissinnaanissaannik meeraanerminnilu inuunerissaarluarsinnaanissaannik anguniagaqarneq qulakkeerniarlugit siammasissumik suleqatigiinnissaq pisariaqarluinnarpoq. Kikkut tamarmik tapersiinissamut periarfissaqarlutillu akisussaaffeqarput,” Isumaginninnermut, Ilaqutariinnermut Inatsisinillu Atuutsitsinermut Naalakkersuisoq Martha Abelsen oqarpoq.

”Inuit ataasiakkaat peqqissuunissartik pillugu akisussaaffimminnik tigusinissamut ilikkarpata kiisalu meeqqat inuusuttullu ilaqutariinni, atuarfimmi sunngiffimmilu maligassaqarlualerpata, innuttaasut peqqissut anguneqassapput. Innuttaasut peqqissuunissaat inuit ataasiakkaat akornanni inuiaqatigiinnilu pingaarutilimmik naleqartinneqalernissaanut Inuuneritta sinaakkusiivoq”, Peqqissutsimut Naalakkersuisoq Anna Wangenheim oqarpoq.

”Ajunngitsumik inuuneqarnissaq siunissatsinnut piumasaqaataavoq pingaaruteqartoq. Meeqqat ulluinnarni toqqissisimanerullutik, peqqinnerullutik nuannaarnerullutillu inuuneqarunik, atuarfimmi siumukarluassapput sinnattutillu malillugit ilinniagaqarusunnerulissallutik”, Ilinniartitaanermut, Kultureqarnermut Ilageeqarnermullu Naalakkersuisoq Karl Frederik Danielsen oqarpoq.

Piffissaq ungasinnerusoq isigalugu peqqissutsimik siuarsaaneq

Inuunerittamik iliuuserineqarsimasunut siuliinut sanilliullugu Inuuneritta III peqqissutsimik siuarsaanissamik annertunerusumik ukkataqarpoq. Ulluinnarni inuunermut sapiissuseqarnerulernissaq, qiimanerunissaq, iliuuseqarsinnaassuseqarnerulernissaq nukissaqarnerulernissarlu anguniarneqarpoq.

Innuttaasut peqqinnerulersinneqassappata piffissaq ungasinnerusoq eqqarsaatigalugu iliuuseqartoqartariaqarpoq. Inuuneritta III taamaammat ukiuni qulini atuuttussanngorlugu sivitsorneqarsimavoq. Innuttaasut peqqinnerulernissaannut pilersaarutaasarsimasut siulliit ukiuni tallimani atuutilersinneqarnissaannut piffissalerneqartarsimapput. Ukiuni qulini suliniuteqarnissamut piffissaliinikkut iliuuserineqartut itinerusumik suliarinissaannut periarfissiisoqarpoq.

Meeqqat inuunerissut pillugit anguniakkamik ikorfartuisunik iliuusissanik toqqartuillunilu pingaarnersiuinermut atugassanik ilisimasanik tunngaveqarluarnissamut najukkani paasissutissat qulakkeerinnissapput. Iliuusissat ilorraap tungaanut allannguisinnaasutut naatsorsuutigineqartut pillugit ilisimasanik tunngaveqarluni Inuuneritta III-mi iliuuseqartoqassaaq. Ilutigitillugu naleqqiunneqartut ilumut toraarneqarnersut paasiniarlugu iliuuserineqartut ataavartumik malinnaavigineqassapput.

Inuuneritta III Naalakkersuisut nittartagaanni uani atuarneqarsinnaavoq.

Attavissat

Paasisaqarnerunissamut Martha Abelsenip Naalakkersuisumut allattaa Inger Heilmann Larsen attavigiuk, e-mail: ihla@nanoq.gl imaluunniit oqarasuaat: + 299 554160.

Anna Wangenheimip Naalakkersuisumut allattaa, Frederik Siegstad, e-mail: frsg@nanoq.gl imaluunniit oqarasuaat: +299 233993.

Karl Frederik Danielsenip Naalakkersuisumut allattaa, Inuk Kielsen Fleischer, e-mail: ikie@nanoq.gl imaluunniit oqarasuaat: +299 345456.

Sulianut tunngatillugu paasissutissat pillugit Paarisami immikkoortortami pisortaq Ditte Sølbeck attavigineqarsinnaavoq, e-mail: ditt@nanoq.gl imaluunniit oqarasuaat: +299 264995.