Qarasaasiakkut digitaliusumik aaqqissuussinerit tunngavigalugit innuttaasunik kiffartuussineq pitsanngoriarpoq

Aalisarnermut, Piniarnermut Nunalerinermullu Naalakkersuisoqarfiup piffissap ingerlanerani Naalakkersuisoqarfiup nittartagaa Naalakkersuisut gl.-imiittoq nutarterlugu suliaraa. ”IT pillugu periusissiatsinni nutaami siullermik iliuuserisarput tassaavoq nittartakkatta nutarternera, taamaalillunilu taanna apnn.gl atorlugu iserfigineqarsinnaalerpoq. Nutarterinermi tassani pineqarput paasissutissat nittartakkameereersut nutarterneqarnerat, aammali atuisunut aalisarneq, piniarneq nunalerinerlu pillugit paasissutissat periarfissaanerulernissaat pingaaruteqarsimavoq” Naalakkersuisoqarfimmi pisortap Jørgen Isak Olsenip oqaatigaa.

Aalisarneq pillugu sammisani maanna ilaatigut aqutsinissamut pilersaarutit, aalisarnerit MSC-mit uppernarsaaserneqartartut pillugit takussutissiaq, TAC pillugu nassuiaat aamma nunat tamalaat akornanni isumaqatigiissutit kiisalu nunat marluullutik illugiillutik aalisarneq pillugu isumaqatigiissutaat nassaarineqarsinnaalerput. Piniarneq aallaaniarnerlu pillugit quppernerit uumassusilerisunit siunnersuinernik nutaanerpaanik, aqutsinissamut pilersaarutinik aamma nunat tamalaat akornanni isumaqatigiissutaannik kiisalu nunat marluullutik illugiillutik aalisarneq pillugu isumaqatigiissutaannik kiisalu kalaaliminernik nittarsaassinermi suliniarnerit pillugit paasissutissanik nutarteriffigineqarput. Nunalerineq pillugu quppernermi Kalaallit Nunaanni nunalerineq pillugu ataatsimut isigalugu paasissutissat aamma Nunalerineq pillugu periusissiaq 2021-2030 ukiup naalernerani akuerineqariarpat nassaarineqarsinnaalissapput.

Aammattaaq Kalaallit Nunaanni Aalisarsinnaanermut Akuersissutinik Nakkutilliisoqarfimmit ukiumoortumik nalunaarut nassaarisinnaavat, aammali Kalaallit Nunaanni Aalisarsinnaanermut Akuersissutinik Nakkutilliisoqarfik pillugu paasisaqarnerorusukkuit www gflk.gl-imi ujarlersinnaavutit.

Oqaatigineqareersutut innuttaasunik pitsaanerusumik sullissinissamut iliuuserisaq tamanna siulliuvoq, aammali Naalakkersuisoqarfik IT pillugu arlalinnik suliniuteqarpoq, taakkulu paasissutissanik qinnuteqaatinillu suliaqarnermut ajornannginnerusumik periarfissiissapput. Jørgen Isak Olsenip oqaatigaa, ”suliniutit ilaat maanna sullissivik. ql-imi internetsi atorlugu ilanngussinikkut kapisillit pillugit nalunaaruteqartarnermik aaqqiissuteqarfigineqareerpoq, neriuutigaarpullu taamatut aaqqiinikkut nalunaaruteqartarneq aalisartunut oqilisaataassasoq, taamaalillunilu nalunaaruteqartarneq annertusisinneqassasoq”.

Sullissinitta pitsaanerulersinnissaa suleriaatsittalu pitsaanerpaanissaa Naalakkersuisoqarfiup sulissutigiuarpaa, taamaammallu qanoq pitsaanerulersitsinissatsinnut innuttaasunit tusagaqarusuttorujussuuvugut. Isumassarsiatit uunga nassiussinnaavatit apnn@nanoq.gl”, Naalakkersuisoqarfimmi pisortaq naggasiivoq.

Uani taaneqanngitsunik annertunermik paasisaqarusunnermi Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq, apnn@nanoq.gl.

Erseqqinnerusumik paasisaqarusukkuit immikkoortortami pisortaq Amalie Jessen, Aalisarnermut, Piniarnermut Nunalerinermullu Naalakkersuisoqarfimmut attavigiuk, oqarasuaat: 34 50 00, e-mail: amalie@nanoq.gl