Kalaallit Nunaata ilisimatuussutsikkut umiarsuassaa – TARAJOQ – singinneqarpoq

Kalaallit Nunaata ilisimatuussutsikkut umiarsuassaa tallimanngormat 18. september spanskit umiarsualiorfianni Balenciaga-mi singinneqarpoq. Ilisimatuussutsikkut umiarsuassap singinneqarneranut tunngatillugu atissaa ”TARAJOQ” pisortatigoortumik saqqummiunneqarpoq.

Umiarsuup atissaanik januaarimi unammisitsisoqarnerani soqutiginnittorpassuarnut Pinngortitaleriffik qujasorujussuuvoq, siunnersuutit 600it sinnerlugit amerlassusillit tigugatsigit. Tamatumalu kingorna ”Tarajoq” ajugaasutut toqqarneqarpoq. Aqqaluk Lynge-lu atissaanik siunnersuuteqartuuvoq.

Tarajoq qanga imaanut taaguutaasimavoq. Canadami Alaskamilu Tarajoq suli imaanut taaguutaavoq, nunatsinni imaq atorneqalersimavoq taratsullu nerisassiornermut akuutissanut atorneqarnerulersimallutik. Kalaallit oqariaasitoqaasa ilagaat: okalûsai tarajuligssugput, tassa kimittuumik oqaluttoqartillugu atorneqartarsimalluni. Naggueqatigiit inuit nunarsuaq pingasunut immikkoortittarsimavaat ukununnga: Nuna, tarajoq aammalu sila. Tarajoq tuluttut qallunaatullu taaneqartarpoq: ”Darajoq”.

Ilisimatuussutsikkut umiarsuassaq Spaniami inaarlugu sananeqartussaavoq, 2021milu upernaakkut tunniunneqartussaalluni. Umiarsuaq Nuummut tikinnermini pisortatigoortumik atertaartinneqarumaarpoq.

Ilisimatuussutsikkut umiarsuaq 61 meterinik takissusilik sikusiutitut sanaajuvoq, nunatsinnilu kilisaatit arlallit perullugit Spaniami sanaajulluni, norsket titartaasarfianni Skipsteknisk-imik titartarneqarsimalluni. Namminersorlutik Oqartussat Aage V. Jensen-ip aningaasaateqarfiannik taperneqarlutik umiarsuaq 235 mio. kronenik akeqartussatut missingersuusiorneqarsimasoq akilerpaat. Nunatta ilisimatuussutsikkut umiarsuassaata ”Paamiut” taarsertussaavaa, angissutsimigulli atortorissaaruteqarnermigullu ilisimatuussutsikkut avatangiisinullu tunngatillugu suliarisinnaasai annertunerujussuanngortussaapput. Umiartortunngorniarlutik ilinniartut umiarsuarmi sungiusaatitut sulisinnaanissaannut aamma inissaqartitsisoqarpoq.

Ilisimatuussutsikkut umiarsuaq nunatta aningaasaliiffiisa annersarilerpaat, inuiaallu kalaallit imaani pisuussutinik nappateqarnerannut ersersitsisuulluni. Ilisimatusarnermut Avatangiisinullu Naalakkersuisoq Jess Svane ima issuarneqarpoq: ”Imartatta pisuussutaasalu pitsaanerpaamik ilisimatusarfigineqarnissaannut qulakkeerinnikkatta nuannaarutigeqaara, pisorlu Kalaallit Nunaannut tulluusimaarnartuuvoq”.

Annerusumik paasisaqarniaraanni:
Pisortaaneq Klaus Nygaard 36 12 00-imut sianerfigineqarsinnaavoq imaluunniit uunga allaffigalugu: nygaard@natur.gl