Uumassusillit assigiinngisitaarnerat pillugit inuusuttunut workshop-ertitsissapput

Assiliisoq: Flemming Merkel


Uumassusillit assigiinngisitaarnerisa ikiliartornerat pakkersimaarniarlugu suliniuteqarnermi inuusuttut nipaat tusarneqassapput

Uumassusilllit assigiinngisitaarnerannik illersuisut inuusuttut Suliffeqarnermut, Ilisimatusarnermut Avatangiisinullu Naalakkersuisoq Jess Svane suleqatigalugu uumassusillit assigiinngisitaarnerat pillugit inuusuttunut workshop-ertitsissapput ulloq 22. septembari 2020. Inuusuttut 30-it missaat 15-iniit 30-it tikillugit ukiullit workshop-ertitsinermut peqataassapput. Inuusuttut nipaat tusarnissaat sammisarlu pillugu anguniagalimmik oqaloqatigiinnissaq siunertaralugit Inatsisartuni partiit qaaqquneqarsimapput.

Inuusuttut iliuuseqarusunnerat pimoorussinerallu Naalakkersuisup Jess Svanep nuannaarutigaa
Issittumi pinngortitaq allanngoriartorpoq. Sila kiatsikkiartorpoq imaanilu siku naatsorsuutigisamit sukkanerusumik aakkiartorpoq. Silap pissusaata allanngoriartornera pissutigalugu uumassusillit pissuseqatigiiaat avataaneersut Kalaallit Nunaanni siornatigut uumasinnaasimanngitsut tikissinnaalerput. Silap pissusaata allanngoriartornera uumasunut ukioraangat issinneranut, apummut sikumullu kiisalu upernaakkut aasakkullu kiatsilluni aputaaruttarneranut imarortarneranullu naleqqussarsimasut ajornartorsiuteqalerput. Oqimaaqatigiinnerup nikinnera uumassusilinnut pissuseqatigiiaanut sunniuteqartorujussuusinnaavoq tamannalu pinngortitap ataqatigiinneranut aamma ingerlaqqissinnaalluni.

Kalaallit Nunaanni pinngortitaq sakkortusinnaasoq attorneqarsimanngilaq – nunarsuarmilu uumassusillit assigiinngisitaarnerisa ajornartoornerat ulluinnarni toqqaannartumik misiginngikkaanni oqaluuserissallugu eqqumiissinnaavoq. Kisianni uumassusillit assigiinngisitaarnerisa navianartorsiornerat nunarsuarmi tamarmi atuuppoq. Inuusuttut nunarsuarmut isiginnissinnaassuseqarnerat nunarsuarmilu uumassusillit assigiinngisitaarnerisa ajornartooqqanerannut ilaanitsinnik paasinnissinnaassuseqarnerat Naalakkersuisup Jess Svanep nuannaarutigaa:

”- Nuannaarutigaara inuusuttut peqatigalugit Workshop-ertitsisoqarsinnaammat. Misigivara inuusuttut nalunngissuseqarluartut, pinngortitatsinnik kusanarluinnartumik uumasuinillu illersuinissamut akisussaaqataanerminnik tamanna takussutissaasoq isumaqarpunga.”

”- Nunatsinni, Nunani Avanarlerni minnerunngitsumillu nunarsuatsinni isiginnittaaseq eqqarsaatigalugu kalaallit inuusuttut nipaat isumalerujussuupput, kalaallit kulturiat, Kalaallit Nunaannilu pinngortitaq nunallu sananeqaataa Nunani Avannarlerni nunanut allanut sanilliullugit allaanerulluinnarmata. Inuusuttut nipaat tusarneqarnissaat nunarsuarmilu uumassusillit assigiinngisitaarnerisa ikiliartornerannik unitsitsiniarluni suliniarnermut ilanngunneqarsinnaanissaat pissutigalugit tusarnaaqqissaartariaqarpagut.”


Kalaallit Nunaanni Uumassusillit Assigiinngisitaartut pillugit periusissiaq nutaaq

Kalaallit Nunaanni Uumassusillit Assigiinngisitaartut pillugit periusissiassaq nutaaq Naalakkersuisunit tusarniutigineqaqqammerpoq. Kalaallit Nunaanni uumassusillit assigiinngisitaarnerannik periusissiaq 2030-ip tungaanut qulakkeerinneqataassaaq. Periusissiap naammassineqarneratigut patajaatsumik assigiinngisitaartumillu uumassusillit assigiinngisitaartut uumasoqarluarnissaanut tunngaviunissaat qulakkeerneqassaaq – inuiaqatigiinni pinngortitamilu.

”- Uumassusillit Assigiinngisitaarnerat Periusissiamut atorsinnaasatsinnik inuusuttut ilanngussassaannik isiginneriaasiannillu workshop-imi pissarsinissarput naatsorsuutigaara. Inuusuttut pimoorussilluarnertik takutippaat uumassusillillu assigiinngisitaarnerisa ajornartooqqanerannik ilumoorussillutik”,
Naalakkersuisoq Jess Svane naggasiivoq.

Innersuussutit nunarsuarmi isumaqitiginninniarnernut nassarneqassapput
Nunarsuarmi uumassusillit assigiinngisitaartut pillugit nutaanik anguniagaqarnissamik suliaqarnermut Nunani Avannarlerni Suleqatigiinnerup inuusuttunik peqataatitsinissamik suliniutaanut inuusuttut uumassusillit assigiinngisitaarnerat pillugit workshop-ernissaq Kalaallit Nunaata ilanngussassaraa. Uumassusillit assigiinngisitaartut pillugit inuusuttunut
workshop-ertitsinerit assingi Danmarkimi, Sverigemi, Finlandimi, Islandimi Savalimmiunilu ingerlanneqareersimapput. Nunani Avannarlerni inuusuttut ataatsimoorlutik Københavnimi ataatsimeersuarnissaannut workshop-it suliatigut ilanngussinertut atorneqassapput COP15-imilu peqataasut Uumassusillit Assigiinngisitaartunut Isumaqatigiissut pillugu Kinami ataatsimeersuarneranni isumaqatiginninniutigineqarlutillu akuerineqartussanut ataatsimoortumik innersuussutissanut ilanngunneqassallutik.

Uumassusillit assigiinngisitaarnerannik illersuisut inuusuttut Iluuna Sørensen, Kira Lennert Olsen aamma Nuiana Hardenberg workshop-eqarnissaq sioqqullugu imannak oqaaseqarput:

”- Nunarsuarmi ajutooqqanerup qiterpiaaniitilluta nunarsuatsinni pinngortitaq tunulliullugu aningaasaqarnikkut siuariartorneq arlalitsigut salliunneqartarmat annilaanganarpoq. Siunissami kinguaariinnit qanoq eqqaamaneqarusuppugut? Ilisimatuussutsikkut ilisimasat akimorlugit iliuuseqarsimanngitsutut, imaluunniit uumassusillit assigiinngisitaarnerisa ikiliartornerannik unissaaniarluta iliuuseqarsimasutut? Uumassusillit assigiinngisitaarnerisa ajornartooqqanerannik ilumoorussineq nalinginnaasuullunilu taamaattussaanera nutaamik periusaassasoq isumaqarpugut.”


Workshop pillugu paasissutissat
Sumiiffik: Katuaq, Imaneq 21, 3900 Nuuk
Ulloq: 22. septembari 2020
Piffissaq: 17:00-21:15

Uumassusillit assigiinngisitaarnerat pillugu workshop-ertitsinissaq inuusuttunit nammineq aaqqissorneqarpoq, Naalakkersuisoq Jess Svane suleqatigalugu. Inatsisartuni partiit tamarmik workshop-imut ataatsimik peqataatitaqarnissamut periarfissinneqarsimapput.

COVID-19-imut killilersuutigineqartut pissutigalugit workshop-imut qaaqquneqarsimagaanni aatsaat peqataasoqarsinnaavoq.

Paasisaqarnerunissamut attavigineqarsinnaavoq Naalakkersuisoqarfimmi pisortaaneq Mette Skarregaard Pedersen, oqarasuaat 346469 imaluunniit e-mail mesp@nanoq.gl.

Inuusuttunut uumassusillit assigiinngisitaartunik illersuisunut attavissaq:
Kira Lennert Olsen
Oq.: 531897
E-mail: kirasofie@outlook.dk