Qeqertarsuatsiaani nannut ajornartorsiutigineqartut toqunneqartariaqarsimapput

Asseq: Øystein Wiig Zoologisk Museum, Oslo

Nanoq anaanaq piaraalu marluk kommunefoged-miit piniartumiillu toqunneqarput, ataasinngormalli nannut qimaatinniarsarineqareeraluartut.

Ataasinngormalli Aalisarnermut, Piniarnermut Nunalerinermullu Naalakkersuisoqarfiup kommunefoged piniartorlu suleqatigiillutik nanoq anaanaq piaraalu marluk Qeqertarsuatsiaat eqqaanniik arlaleriarlutik qimaatinniarsarigaluarpaat. Nunatsinni nanoq arnaviaq piaqqisartoq piaqqallu eqqissisimatitaapput.
Paasissutissat tiguneqartut malillugit inuit inuunerannik ulorianartorsiortitsisoqarsimanngilaq ataasinngornermiit sisamanngorneq ilanngullugu, nannut kingullermik takuneqarneranniit.

Qaattoorfinnut qimaatinneqaraluarput. Ippassaq ualikkut Qeqertarsuatsiaat qeqertaata kujataata tungaanut qaqisimapput. Unnualli ingerlanerani nanoq anaanaq piaraalu nunaqarfimmut utersimapput quinilu illut eqqaanniittuni pilianik nerisimallutik aammalu kalaalimineerniarfiup eqqaanniissimallutik.

Taamaattumik kommunefoged piniartullu politiit Naalakkersuisoqarfillu isumasioreerlugit nanoq anaanaq piaraalu toqunneqarput.

Naalakkersuisoqarfiup qujaffiginiarpai kommunefoged aamma piniartoq kiisalu nunaqarfimmi innuttaasut paasinnillutik naammagittarlutillu pimmata nannut qimaatinniarsarineqarnerini. Naalakkersuisoqarfiup pisup nalaani erseqqissaatigiuaannarsimavaa inuup inuunera pingaarnerusoq qaasuttunik inoqarfiup eqqaaniittoqartillugu. Inatsisit malitassallu tamarmik nunaqarfimmiunit malinneqarsimapput.


Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl