COVID-19 – Kalaallit Nunaannut tikinnermut innersuussutit nutaat

COVID-19-ip tuniluunnera Danmarkimi aamma nunani allani arlalinni annertusiartorpoq. Tuniluunnerup annertunera Nakorsaaneq annilaangassuteqarluni oqarpoq, tuniluuttoqarnerata Kalaallit Nunaannut eqqunneqarsinnaanera annertunerulermat.

Taamaattumik Naalakkersuisut Kalaallit Nunaannut tikinnermut innerssuussutit nutaat akueraat:

Danmarkimi kommunimi “aappaluttumiissimallutik” – tassalu kommunimi annertuumik tuniluuffiusumiissimallutik – tikittut kajumissaarneqarput:
- tikinnerminniit ullut tallimat qaangiunnerini misissorteqqeqqullugit
- COVID-19-imik tunillatsissimannginnerup uppernarsarneqarnissaata tungaanut allanut qanillinaveersaaqqullugit aamma aaqqissuussinernut, inuit katersuuffigisaannut peqataanngilluinnaqqullugit

www.ssi.dk/covid19data iserfigalugu kommunit suut aappaluttuunersut, aammalu sumut angalanermi immikkut mianersortoqartariaqarnersoq takuneqarsinnaavoq.

Kikkut qaqugumiit misissorteqqissinnaappat
Angalasut, pingasunngornermi septembarip ulluisa 16-anniit tikissimasut ataasinngornermiit septembarip ulluisa 21-anniit misissortissinnaapput.

Tikinnissamut nalunaarut atuuttoq naapertorlugu ornitassamut § 7-imut ilaasumut angalasimagaanni, suli Kalaallit Nunaannut tikinnermiit ullut tallimat qaangiunnerini misissorteqqittoqartussaavoq imaluunniit angalanerup ingerlaqqinnginnerani ulluni 14-ini mattusimasoqartussaalluni.
Nalunaarut nassaarineqarsinnaavoq, uani.

Pissutsit malinnaaffigilluarneqarput
COVID-19-ip Danmarkimi nunanilu allani tuniluunnerat malinnaaffigilluarneqarpoq, tuniluunnerlu ajorseriaqqippat, pingaartumillu Danmarkimi, tikittussanut innersuussutinik killilersuinernillu nutaanik pilertortumik atuutsitsisoqalissaaq.

Naalakkersuisoq Anna Wangenheim:

”Danmarkimi COVID-19-ip tuniluunnerani immikkoortut aappaat ingerlavoq, maannamullu Kalaallit Nunaanni immikkoortoq siulleq pinngitsoortingajavissimavarput. Tikittartunik nakkutilliilluta iluatsilluartumik iliuuseqarnerput peqqutigalugu, aammalu innuttaasut akisussaassuseqarluarlutik peqqissutsimik suliallit siunnersuutaannik malinnissimanerat peqqutigalugu tamanna angusimavarput. Taamaattumik COVID-19-ip tuniluunnerata annikinnerpaatinnissaa iluatsissagutsigu tamatta akisussaassuseqarluta iliuuseqartariaqarpugut. Peqqissutsimik suliallit siunnersuutaat ilisimavagut – kisiannili aamma malissavagut.”

Peqqissutsimik suliallit siunnersuutaat eqqaamakkit
- Qanillinaveersaarit
- Assamminnerit pakkussinerillu pinaveersaakkit
- Assannut quersornak
- Errortorluartarit

Suliniutit allat

Maannarpiaq tikinnissamut nalunaarut nutarterlugu suliarineqarpoq, Danmarkimi tuniluunnerup annertusiartornera ilaatissinnaaniarlugu, tamatumalu peqatigisaanik tikittut misissorteqqittarnissaannik pisariaqartitsineq naammassisinnaaniarlugu.

Aamma Namminersorlutik Oqartussani sulisut tikittunik najorlugit ataatsimeeqateqartarnerinut, tamatumunngalu atatillugu inuit katersuuffigisinnaasaanni ataatsimooqatiginnittarnernut maleruagassanik atuutsitsisoqalissaaq. Assersuutigalugu Danmarkimit nunanillu allanit tikittunik ataatsimeeqateqartarnerit aatsaat tamanna pisariaqarluinnarpat pisinnaassapput. Kalaallit Nunaannut tikittartut ammaanneqarnerisa kingorna, Namminersorlutik Oqartussaniit sulinermut atatillugu angalanerit taamaallaat pisariaqarluinnartut ingerlanneqartareerput.

Naalakkersuisunit inassutigineqarpoq, suliffeqarfiit maleruagassanik taakkuninnga atuutsitsilissasut.