Nunaqarfinni pinaveersaartitsineq ukkatarineqarpoq

Septembarip aallartinnerani Maniitsup nunaqarfiini pingasuni tikeraarnerni meeqqanut ilaqutariinnullu tunngatillugu unammilligassarpassuarnik pinaveersaartitsinermik suliaqarnermi tunniusimanerujussuaq Isumaginninnermut, Ilaqutariinnut Inatsisinillu Atuutsitsinermut Naalakkersuisup Martha Abelsenip misigivaa.

Nunaqarfinni isumaginninnermut, peqqinnissaqarfimmut, meeqqat atuarfiini, sunngiffimmi suliassaqartitsivinni kommunefogeditullu sulisut nunaqarfinni meeqqat ilaqutariillu pitsaanerusumik atugaqalerlutillu nuannaarnerulernissaat siunertaralugu unammilligassat pinaveersaartitsinerillu ataatsimoorlutik sulissutigaat.

Sulinermi misilittagarilluarneqalersut atorneqarnissaat pingaaruteqarpoq, allanillu misilittakkanik avitseqatigiittoqarsinnaanissaa isumassarsiffigalugillu ingerlariaqqittoqarsinnaanissaa kissaatiginarpoq. Tamanna sulisunit ilaatigut oqariartuutigineqarpoq. Sulineq Naalakkersuisut tapersersorpaat,” taama Isumaginninnermut, Ilaqutariinnermut Inatsisinillu Atuutsitsinermut Naalakkersuisoq, Martha Abelsen, oqarpoq.  

Naalakkersuisut ilaqutariit pillugit politikkiat naapertorlugu nunaqarfinni iliuuseqartoqarpoq, meeqqat ilaqutariillu pitsaasumik atugaqarnissaat inuunerisalu pitsaasuunissaat immikkut pingaartinneqarlutik. Inuiaqatigiinni inooqataanikkut ataatsimoorfigisani ilaqutariit nukittunersaapput tassaallutillu meeqqat peroriartornermi atugaannut tunngaviusut.

Meeqqanut ilaqutariinnullu tunngatillugu suliamik annertuumik Naalakkersuisut aallartitsisimapput ilaatigut nuna tamakkerlugu angajoqqaat meeqqaminnik sumiginnaanerannut iliuusissatut pilersaarusiornikkut, kiisalu Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu akornanni suleqatigiinnermi suliniutissat 16-it. Suliniutissat arlaqartut Pitsaaliuinermut Isumaginninnermullu Aqutsisoqarfimmi, taassumalu ataani Paarisami kommunenilu inissisimapput.

 

Paasisaqarnerorusukkuit naalakkersuisup allattaa Inger Heilmann Larsen e-mailikkut: ihla@nanoq.gl imaluunniit oqa. +299 554160-mut attavigiuk