Ilinniarsimassutsip qaffasissusaa qaffakkiartorpoq

2019-imi innuttaasut 16-iniit 74-it akornanni ukiullit 40 %-iisa missaat meeqqat atuarfiannit qaffasinnerusumik ilinniagaqarput. Ukiut qulit ingerlaneranni tamanna 7,8 procentinik qaffariarsimavoq. Kisitsisitigut paasissutissani takuneqarsinnaavoq 11,7 procentii ingerlaqqiffiusumik ilinniagaqartut, 27,8 procentiilu ilinniarnertuunngorniarfimmi inuussutissarsiutitigullu ilinniagaqartut imaluunniit ilassutaasussamik pikkorissarsimasuusut. Naatsorsueqqissaartarfiup sapaatip akunneq una nalunaarutigaa.

Kisitsisitigut paasissutissani innuttaasut ilinniakkanik naammassisaat takuneqarsinnaapput, tamannalu innuttaasut ilinniarsimanerisa qaffasissusaat ilinniartitaanermilu periuserineqartut ineriartorneranut malinnaanissamut periarfissiivoq.
Innuttaasut ilinniarsimanerisa allanngornerisa taamaallaat piginnaasaqalersitsisumik ilinniagaqarsimanersut ersersinngilaat Kalaallit Nunaannut nuuttartut aamma Kalaallit Nunaannit nuuttartut ilinniarsimasaasa qaffasissusaat aamma sunnertarpaat. Ilinniagaqarsimassutsilli qaffasissusaanut nalunaarsuutit innuttaasunut inuusunnerusunut nalinginnaasumik matussusiinerupput.

Arnat ilinniarsimasut amerlanerit
Arnat angutinit amerlanerusut meeqqat atuarfiata saniatigut ilinniagaqarput. 2019-imi arnat 42,8 procentii angutillu 36,5 procentii inuusuttunut ilinniarfinni ingerlaqqiffiusumilluunniit ilinniarfimmi ilinniagaqarsimapput .
Innuttaasut 35-iniit 44-nut ukiullit akornanni amerlanerit inuusuttuni ilinniarfinni ingerlaqqiffiusumillu ilinniarfinni ilinniagaqarsimapput, taamatut ukiullit ilinniagaqarsimassutsit qaffasissusaanni taakkunani 57 procentit ilinniagaqarlutik.
Ilinniartitaanermut, Kultureqarnermut Ilageeqarnermullu Naalakkersuisuugallartup Karl Frederik Danielsenip kisitsisit nutaat nuannaarutigai.

- Naatsorsueqqissaartarfiup kisitsisit saqqummiussai kusanaqaat. Ilinniagaqarsimassutsip qaffannissaanut sivisuumik uteriitsumillu sulissuteqaqqaarnissaq qularutissaanngilaq, kisitsisilli takutippaat ilinniagaqarsimassutsip qaffannissaanut anguniagaqarnitsinni pitsaasumik siuariaateqartoqarsimasoq ilinniarfigilluarsinnaassatsinnik, Ilinniartitaanermut, Kultureqarnermut Ilageeqarnermullu Naalakkersuisuugallartoq Karl Frederik Danielsen oqarpoq.

- Suli suliassaqarpugut taamaattorli angusarissaarnerit Naatsorsueqqissaartarfimmit takutinneqartut taakkunanngalu misittakkat ersersinnissaat pingaaruteqarpoq, Karl Frederik Danielsen oqarpoq.

Paasissutissat sukumiinerusut Ilinniartitaanermut, Kultureqarnermut Ilageeqarnermullu Naalakkersuisoqarfimmi naalakkersuisumut allatsimut Rosa Thorsenimut rosath@nanoq.gl +299553303 saaffiginninnikkut pissarsiarineqarsinnaapput.