Kalaallit Nunaanni LGBT-p ukiuni 10-ni nalliuttorsiorneranut atatillugu Peqqissutsimut Naligiissitaanermullu Naalakkersuisup Anna Wangenheimip pilluaqqussutaa

Arfininngorneq ulloq 12 september 2020, Kalaallit Nunaanni LGBT Pride ukiuni 10-ni nalliuttorsiornera malunnartinneqassaaq. LGBT-mi oqaatsit tassaapput arnaqatiminoortut, anguteqatiminoortut, suiaassutsimikkullu allannguisimasut. COVID-19 pissutigalugu killilersuinerit  kingunerisimavaa nalliuttorsiornissamut aaqqissuussaq unitsinneqarnera. Peqqissutsimut Naligiissitaanermullu Naalakkersuisutut pingaartippara LGBT-mut ilaasortat ukiuni 10-ni nalliuttorsiorneranni pilluaqqussallugit. Ukiorpassuarni sulissutaasimavoq inuiaqatigiinni, inuiaassutsip aamma kinguaassiutitigut inissisimanerup assigiinngisitaartut paasineqarlutillu akuerineqarnissaat. Tulluusimaarutigaassi tamassi, maani nunatsinni assigiinngissutsitsinnik inissaqartitsinissamut pakkutaarinninnissamullu sukataaruteqarsimasusi.

 

Nalunanngitsumilli suli unammillernartoqarpoq, tassani inuit ataasiakkaat immikkoortitaaneq misigisarpaat, kinaassusertik aamma kimut asanninnertik, imaluunniit qanoq isikkoqarnertik pissutigalugit nakuuserneq misigisarpaat. Neriuppunga upperalugulu, ukiut ingerlanerini ineriartorneq pitsaasoq ingerlaannassasoq. Sulinersi qularnanngitsumik inuppassuit inuunerannut annertuumik sunniuteqarnikuuvoq, nammineq kinaassutsip takutissinnaanissaanut sapinnginnermut atatillugu, aammali nammineq kinaassutsip imminut allanullu toqqortortariaqannginneratigut ataqqinartumik inuuneqarnermut atatillugu. Nunarsuaq assingiinngissuseqarnissamut periarfissaqartoq kiisalu inuit pisinnaatitaaffii kikkunnut tamanut atuuttut, innuttaasut ilaannaanuunngitsoq upperisariaqarparput Taamalu oqarlunga, neriuppunga ulloq manna malunnartinniarlugu immikkut nalliussinissaanut piffissaqarumaartusi,  ilissi suliassinnutannertulluinnartumut, ilaquttasilu, inuillu tapersersuisuusut  qutsavigaassi.

 

Paasisaqarnerorusukkuit naalakkersuisup allattaa Frederik Siegstad oqarasuaat +299 23 39 93 imaluunniit email frsg@nanoq.gl aqqutigalugit pissarsiarineqarsinnaapput.