Amaqqut pillugit nalunaarut nutaaq Naalakkersuisunit akuerineqarpoq

Amaqqut pillugit nalunaarut nutaaq 10. september 2020-mi Naalakkersuisunit akuerineqarpoq. Amaqqut pillugit nalunaarutip nutaap pingaarnertut siunertaraa Qaanaap aamma Ittoqqortoormiit aqutsiveqarfianni amaqqut piniakkanut neqissaqarniarnermut pingaaruteqartunut akornusiinerisa millisarneqarnissaat. Aalajangersakkat pingaarnersiorlugit makkuupput:
  • Amaqqut aqutsiveqarfimmi Qaanaami aamma Ittoqqortoormiini inuussutissarsiutigalugu piniartunut ukioq kaajallallugu piniagaalerput.
  • Amaqqut Kalaallit Nunaata sinnerani eqqissisimatitaapput.
  • Naalakkersuisut amarortassiissutit annerpaaffissaannik aalajangiissapput.
  • Amarorniarnissamut qoorortuunut sulloqqortussutsimut piumasaqaat.
  • Assartuutit motoorillit amarorniarnermi atoqqusaanngitsut.
  • Amaqqunik pissatanik toqutsinissamut piumasaqaatit.
  • Kommunit ileqqoreqqusaliornikkut piumasaqaateqarsinnaapput.
  • APNN-mut pisanik nalunaaruteqarnissaq pillugu piumasaqaat.
  • Imminut illersortariaqarnermi iliortariaqarnermiluunniit amaqqumik toqutsisoqareernermi maleruagassat.
  • Aalisarnermut, Piniarnermut Nunalerinermullu Naalakkersuisoq amaqqut inoqarfinnut qaninngoortut inoqarfinnukartulluunniit pillugit maleruagassanik atuutilersitsissasoq.
  • Amaqqunik nalunaaqutsiineq APNN-ip akuersissuteqarneratigut aatsaat pisinnaasoq.
  • Amaqqut uumasuutigineqaqqusaanngitsut.
  • Ilisimatusarnermik siunertalinnut immikkut akuersissuteqarsinnaaneq.
  • Nalunaarummi aalajangersakkanik aalajangersimasunik unioqqutitsinermi pineqaatissiissutit.
Amaqqut illersorneqarnissaat piniagaanerallu pillugit nalunaarut nutaaq nr. 33 11. september 2020-mi atuutilerpoq.

Tunuliaquttatut paasissutissat ilanngussat:
  1. Nalunaarut nutaaq ilanngussallu
  2. Piniartut ilisimasaat katersukkat
  3. Biologit inassuteqaataat
  4. Ilisimatuut amaqqut pillugit ilisimasaat.
Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl