Palle Jeremiassenimit Sermitsiaq nr. 36-mi 2020-mi oqaaserineqartunut ilumuunnginneraaneq

Qaleralinniarnermut aalisarsinnaanermut akuersissutinut tunngatillugu Palle Jeremiassenimit Sermitsiaq nr. 36-mi 2020-mi oqaaserineqartunut ilumuunnginneraaneq

Matumani Arne Mølgaardimit Sermitsiaq nr. 36-mi 2020-mi qupperneq 18-mi qulequtaq 'Palle Jeremiassen aalisarsinnaanermut akuersissutinut paatsiveeruttoqarneranut kamappoq' saqqummiunneqartoq pineqarpoq.

Palle Jeremiassen aamma Hanseeraq Enoksen ilaatigut oqarput angallat Kalaallit Nunaanni Aalisarsinnaanermut Akuersissutinik Nakkutilliisoqarfimmit aalisarsinnaanermut akuersissummik tunineqarsimasoq.

Matumuuna erseqqissarneqassaaq Palle Jeremiassenip aamma Hanseeraq Enoksenip oqaatigisaat eqqunngimmata, tassami sinerissap qanittuani qaleralinniarnissamut aalisarsinnaanermut akuersissutit kommunimit imaluunniit Aalisarnermut, Piniarnermut Nunalerinermullu Naalakkersuisoqarfimmit tunniunneqartarmata.

Kalaallit Nunaanni Aalisarsinnaanermut Akuersissutinik Nakkutilliisoqarfik aalisarnermut nakkutilliisuuvoq.

Sinerissap qanittuani qaleralinniarnissamut aalisarsinnaanermut akuersissutinut malittarisassat paatsoorneqarsimaneranut oqarnermut tunngatillugu erseqqissarneqassaaq sinerissap qanittuani qaleralinniartarnermi aalisariutit angallatinut immikkoortinneqartarmata, tassa angallatit meterinik arfinilinnik anginerusut aamma umiatsiaaqqat meterinik arfinilinnik mikinerusut.

Angallatinut meterinik arfinilinnik anginerusunut pisassiissutit niuerutigineqarsinnaasut nammineq pigisat tunniunneqartarput. Aqutsiveqarfik sumiinnersoq apeqqutaatinnagu angallatit pisassiissutinik pisisinnaatitaallutillu tuniniaasinnaatitaapput. Matumani umiatsiaaqqat pineqanngillat, tassanimi paggatassiissutinik aalisartoqartarpoq. Aqutsiveqarfik 47-mut umiatsiaaqqanut akuersissutit aqutsiveqarfinni 47-runi tamani atuuppoq, taamaalilluni aqutsiveqarfinnut pingasunut agguagaanani.

Sinerissap qanittuani qaleralinniarneq pillugu Namminersorlutik Oqartussat nalunaarutaat nr. 11, 28. august 2014-imeersoq naapertorlugu taamaasilluni angallatit immikkut tamarmik pisassallit erseqqissumik immikkoortinneqarsimapput, piumasaqaatillu assigiinngitsut aallaavigalugit aalisarneqartarluni. Angallatigineqartuni pisassiissutinik niueruteqartarneq, angallammillu piginnittup aqutsiveqarfimmi sorlermi najugaqartuunera pisassiissutigineqartunut umiatsiaaqqallu aalisarpallaarnerannut sunniuteqanngillat.

Sinerissap qanittuani qaleralinniarneq pillugu nalunaarutip kukkunersiorneqarnera aamma takoqquneqarpoq, tassani nalunaarut kukkunersiorneqarsimasoq tusarniutigineqarsimalluni, ukiallu ingerlanerani Naalakkersuisunut saqqummiunneqartussatut ilimagineqarluni.

Paasissutissanik suli allanik, uani taaneqanngitsunik pissarserusukkaanni Aalisarnermut, Piniarnermut Nunalerinermullu Naalakkersuisoqarfimmut saaffiginnittoqarsinnaavoq, e-mail: apnn@nanoq.gl