Erninermi sulinngiffeqartarneq pitsaanerusoq ilaqutariinnik nukittorsaassaaq

Inatsisartut ukiaanerani ataatsimiinnissaanni Isumaginninnermut, Ilaqutariinnut Inatsisinillu Atuutsitsinermut Naalakkersuisoq, Martha Abelsen siunnersuummik saqqummiissaaq, naartunermut, erninermut meeravissiartaarnermullu atatillugu angajoqqaanut piffissaqartitsilernerusoq pitsaanermillu aningaasaqartitsisoq. Ilaqutariit nukittuujunissaat meeqqallu atugarissaarnissaannut qulakkeerinninnissaq anguniarneqarpoq.

Naartunermut, erninermut meeravissiartaarnermullu tunngatillugu siunnersuutip Kalaallit Nunaanni suliffeqarfiit namminersortut erninermut atatillugu aningaasaateqarfeqalersissavai angajoqqaallu namminersortuni atorfillit tamarmik erninermut atatillugu sulinngiffeqarnerini akissarsiaasa 80 procentii pisinnaatitaalissavaat. Tamanna akissarsiakinnerpaanut minnerpaaffissaavoq akissarsiakkaajunerpaanullu annerpaaffissaalluni (isumaqatigiissutikkut isumaqatiginninniarnikkulluunniit tamakkiisumik akissarsiaqarnissartik qulakkeersimanngikkunikku).

Erninermut atatillugu sulinngiffeqartarnermut inatsimmut nutaamut siunnersuut ilaqutariippassuit aningaasaqarnerat maannamut naleqqiullugu pitsanngoriaammik nassataqassaaq, ilaasami – pingaartumik ataataasut – aningaasaqarneq pissutigalugu sulinngiffeqarnissaq toqqarneq ajoramikku.

Naligiissitaaneq ilaqutariittullu inuuneqarnerulerneq
Nunanit allanit misilittakkat ersersippaat suliffeqarfeqarfimmi erninermut atatillugu aningaasaateqarfik naligiisitsinerulernermik qulakkeerinnittartoq aamma ilaqutariittut inuunermut iluaqutaasartoq. Sulisitsisut aningaasaateqarfik aqqutigalugu erninermut atatillugu sulinngiffeqarnermut aningaasartuutaasut nammaqatigiissumik agguataaraangamikkit arnanik erninissamut naleqquttumik ukiulinnik atorfinitsitserusunnerusarput. Soorlu aamma ersertitsisoq ataatanngorlaat sulinngiffeqarnerunissamik sapiissuseqarnerulersartut meerartaaminnullu qaninnerusumik ataqatigiilersartut.

“Inuiaqatigiinni ilaqutariit tunngaviupput, meerartatta inuusuttortattalu atugassarititaat pitsanngorsarniarutsigit maani aallartiffeqartariaqarpugut. Meeqqap inuuneraniit piffissaq siulleq aalajangiisuuvoq.” erninermut atatillugu sulinngiffeqartarnerup pitsanngortinnissaanut tunngavilersuutigalugu Martha Abelsen taama oqarpoq.

Eqaassuseq ilaqutariillu aalajangigaat

Siunnersuut ilaqutariinnut pitsannguisunik arlalinnik imaqarpoq. Ilaatigut naartusut erninnginnermi sapaatit akunneri sisamat sioqqullugit sulinngiffeqarsinnaatitaalissapput angajoqqaatullu sulinngiffeqarnermi sapaatit akunnerini sisamani kingullerni malittarisassat eqaannerulissallutik.

Assersuutigalugu angajoqqaat suliartoqqikkunik sapaatit akunnerini arfineq-pingasuni piffissami affaannarmi sulissallutik aalajangersinnaavaat, tamakkiisumik sulillutik aallartinnatik. Ilaqutariit eqqissisimanerusumik naleqqussarnissaannut qulakkeerinninnerussaaq, meeqqap meeraaqqerivimmi aallartinnera eqqissisimanerusumik pisinnaassaaq – meeqqamut angajoqqaanullu iluaqutaasoq. Imaluunniit alliartornermi angajoqqaat sulinngiffeqarnerini sapaatit akunneri sisamat kingulliit piffissamut kingusinnerusumut nuutsissallugit aalajangersinnaavaat – assersuutigalugu meeqqerivimmi aallartinnermi.

Ilaqutariinnermut politikki 2020 – 2030

Erninermut atatillugu sulinngiffeqarnermut siunnersuut nutaaq pilersaarutitut Inatsisartuni amerlanerussuteqalerpat, Ilaqutariinnermut Naalakkersuisut politikkianni 2020-mit 2030-moortumi pingaarutilimmik siullertullu piviusunngortitsisuussaaq. Ilaqutariinnermut politikki saqqummersinneqaqqammerpoq Naalakkersuisullu nittartagaanni uani nassaarineqarsinnaalluni.

Ukiuni qulini aggersuni ”Ilaqutariinnermut politikki 2020-2030”-mi Naalakkersuisut pingaarnertut anguniakkat meeqqanullu aamma ilaqutariinnut suliassaqarfimmi siunissamut ungasinnerusumut sammititat aalajangersarsimavaat. Naalakkersuisut inuiaqatigiit akornatigut ilaqutariinnik qitiutitsiniarput ilaqutariinnullu sinaakkutit pitsanngorsarlugit.

“Ilaqutariit nukittorsarniarpagut. Isumaga naapertorlugu periarfissatut aqqutissatuaq tassaavoq sumiginnaasarnermit, atornerluinermit nakuusernermiillu aniguineq”, Martha Abelsen oqarpoq, pingaartitarivaalu ilaqutariit tassaasut isumaginninnikkut ataatsimoorneq nukittunerpaat ilaqutariillu toqqissisimasut ingerlalluartullu meeqqamik peroriartortitsinermi atugassarititanik pitsaanerpaanik tunisisinnaasut.

Sukumiinerusumik paasissutissat pillugit naalakkersuisup allattaa attavigineqarsinnaavoq, Inger Heilmann Larsen e-mailikkut: ihla@nanoq.gl imaluunniit oqarasuaatikkut + 299 554160