Imminut toqunnissamik pinaveersaartitsinermut nunarsuaq tamakkerlugu ullup malunnartinneqarnera Naalakkersuisut tapersersorpaat

10. septembari tassaavoq imminut toqunnissamik pinaveersaartitsinermut nunarsuaq tamakkerlugu ulloq (World Suicide Prevention Day - #WSPD). Imminut toquttarnermik aamma imminut toqunnissamik pinaveersaartitsineq pillugit soqutiginnilersitsiniarluni ulloq nunarsuaq tamakkerlugu malunnartinneqarpoq. Taanna aamma Kalaallit Nunaanni atuuppoq. Tamaani imminut toqunnissamik pinaveersaartitsineq pillugu soqutiginnilersitsiniarluni ulloq 10. septembari nal. 20:00 kikkut tamarmik igalaani naneruummik ikitsinikkut peqataasinnaapput. Ulloq aamma sumiiffinni aaqqissuussanit malunnartinneqassaaq, taakku Naalakkersuisunit aningaasaliiffigineqarput.

Ukiormanna aamma imminut toqunnissamik pinaveersaartitsinermut nunarsuaq tamakkerlugu ullup malunnartinnissaanut atatillugu, sumiiffinni aaqqissuussat ingerlanneqarnissaannut aningaasaliissutinik qinnuteqarnissaq periarfissaqarsimavoq. Nuna tamakkerlugu illoqarfinni aamma nunaqarfinni 15-ini sumiiffinni aaqqissuussinernut Naalakkeresuisut tapiissuteqarsimapput.

Naalakkersuisut sulinerat ingerlaannarpoq
Naalakkersuisut imminut toqunnissamik pinaveersaartitsinermut periusissamik nutaamik suliaqarput. Taanna Naalakkersuisut siusinnerusukkut imminut toqunnissamik pinaveersaartitsinermut suliassaqarfimmi suliarisimasaannik nalilersuinermik tunngaveqarpoq. Periusissami nutaami imminut toqunnissamik pinaveersaartitsinermut suliniutit nunaqqatigiinni pisut aamma pisariaqartitat aallaavigalugit ineriartortinneqarnissaat pingaarnertut ukkatarineqassapput. Periusissiap nutaap ineriartortinneqarnerani innuttaasunut, inuusuttunut utoqqaanerusunullu ornigulluni, taakku tarnikkut peqqinnerulernissap anguneqarnissaannut qanoq sulinissatsinnut naliliinerat isumassarsiaallu ukkatarineqassapput.

Imminut toquttoqarnera inuppassuarnut sunnertissutaasarpoq
Imminut toquttarneq nunarsuaq tamakkerlugu qaangerniagassaavoq. Ukiut tamaasa nunarsuaq tamakkerlugu inunni utoqqaassutsini tamani imminut toquttarneq toqussutigineqartut sallersaat 20-t akornanniittarpoq. Imminut toquttarneq nunami maani inuiaqatigiinni ajornartorsiutaavoq annertooq. Kalaallit Nunaanni Politiit 2019-imut Ukiumoortumik kisitsisinngorlugit paasissutissiinerat naapertorlugu 2019-imi inuit 45-t imminut toqussimapput.

Imminut toqunnerit amerlanerujussuisa kingunerisaanik, inuppassuit aappaminnik, meeqqaminnik, angajoqqaaminnik, ikinngutiminnik imaluunniit suleqatiminnik annaasaqarnermik nalaataqarsimapput. Imminut toqunnerit tamaasa inuppassuit, aliasorujussuarnermik misigisaqartarput imaluunniit allatut sunnerneqartarlutik.

”Misigissutsit oqimaatsut aamma taarsiornermi eqqarsaatit pillugit ammarnissaq aamma oqalussinnaanissaq oqitsuinnaanngilaq. Kisianni uagut inuttut ikioqqussagutta imaluunniit allanik ikiuunniarutta taanna siuariaatissaavoq, sapiissuseqarnissarlu amerlanertigut pisariaqartarluni”, taama oqarpoq Isumaginninnermut, Ilaqutariinnut Inatsisinillu Atuuttitsinermut Naalakkersuisoq, Martha Abelsen nangillunilu:

”Ammasumik periuseqarneq, soqutiginninneq aamma najuunneq inuup inuuneranik allannguinissamut aamma imminut toqunnissamik pinaveersaartitsinermut aqqummi alloriarnerupput siulliit. Ulloq 10. septembari ulluuvoq, imminut toqussimasunut, imminut toqoriaraluarsimasunut aamma imminut toqunniarluni eqqarsaateqarnermut atasunik paasissutissiilluta aamma paquminartitsiunnaarnissatsinnik malunnartitsiffiusussaq”.

Kikkut tamarmik allanngueqataasinnaapput
Kikkut tamarmik imminut toqunnissamik pinaveersitsinermut tapersiisinnaapput. Innuttaasutut, ilaqutaasutut imaluunniit suleqatitut allanngueqataasinnaavutit. Imminut toquttoqartarneq aamma imminut toqunnissamik eqqarsaatit pillugit oqalusinnaanikkut, imminut toquttoqartarneranut, imminut toqunniarluni pissusilersornermut aamma tarnikkut ajornartorsiuteqarnermut atatillugu paquminartitsinermik apeqqusiinikkut, artorsartunut misiginneqataanermik ersersitsinikkut aamma isumassuinikkut, illillu nammineq misigisannik avitseqateqarnikkut paquminartut paquminarunnaarnissaannut peqataasinnaavutit. Imminut toquttarneq aarlerinaataasinnaasullu pillugit ilisimasanik aamma ujarlersinnaavutit.

Imminut toqunnissamik pinaveersaartitsineq pillugu soqutiginnilersitsineq annertusarlugu peqataasinnaavutit aamma imminut toquttoqarneratigut inuunerminnik annaasaqarsimasut ulloq 10. septembari nal. 20:00 igalaani naneruummik ikitsinikkut eqqaaniarlugit peqataasinnaavutit.

Ikiortissarsiorpit
Ikiorneqarnissat pisariaqartippiuk imaluunniit oqaloqateqarnissamik pisariaqartitsivit, taava Tusaannga oqaras. 801180 imaluunniit 1899-imut SMS aqqutigalugu atassuteqarfiugiuk

Annertunerusumik paasissutissanut Naalakkersuisup allattaa Inger Heilmann Larsen saaffigiuk e-mail: ihla@nanoq.gl imaluunniit oqaras. + 299 554160. Suliaq pillugu paasissutissanut peqqinnissamut siunnersorti Tina Evaldsensaaffigiuk e-mail: tiev@nanoq.gl imaluunniit oqaras. +299 342394