Soraarnerussutisiaqalernissamut aaqqissuussinermut peqataasussaatitaaneq

17. september tassaavoq soraarnerussutisiaqalernissamut aaqqissuussinermut peqataasussaatitaanermi 2019-imut tunngatillugu ileqqaartussaanermik naammassinninnissamut periarfissaq kingulleq

Innuttaasut soraarnerussutisiaqalernissamut 2019-imi ileqqaarsimanngitsut ilagaatsit? Ima­luunniit soraarnerussutisiaqalernissannut akiliutigisimasavit Akileraartarnermut Aqutsi­soqarfimmi nalunaarsorneqarsimannginnerannik nalunaarfigineqarpit? Taava soraarnerus­sutisiaqalernissannut akiliinissamut ulloq 17. september 2020 tikillugu periarfissaraat.

Piffissaliussap qaangiunnissaa qanillilluinnarpoq. Soraarnerussutisiaqalernissamut 2019-imi akiliutitit Akileraartarnermut Aqutsisoqarfiup nalunaarsorsimanngippagit, soraarnerussu­tisiaqalernissamut aaqqissuussinermut peqataasussaatitaanermi ileqqaagassatit aappaa­gu skattekortissanni akileraarusiissutissap procentiata 7%-imik qaffanneratigut akilersin­neqartussanngussapput. 7%-it taakku akileraarutaanngillat, tassaallutilli aningaasat illit nam­mineq soraarnerussutisiaqalernissannut akiligassatit.

Ukiumoortumik naatsorsuut suli tigunngiliuk? Soraarnerussutisiaqalernissamut ileqqaartus­saatitaanerit naammassineqarsimasutut nalunaarsorneqarsimanersoq takulertoru­ma­guk­ku, soraarnerussutisiaqalernissamut aaqqissuussinermut peqataasussaatitaaneq pillu­gu ukiumoortumik naatsorsuut Sullissivik.gl-imi aasinnaavat.

Soraarnerussutisiaqalernissannut akiliutinnik uppernarsaanissat, qanorlu iliorlutit Akile­­-raar­tarnermut Aqutsisoqarfimmut nassiussinissat pillugit ilitsersuut sukumiisoq Sullissivik.gl-imiippoq. Tassanissaaq takusinnaavatit soraarnerussutisiaqalernissamut aaqqissuus­sinermut peqataasussaatitaaneq, kikkut ileqqaartussaatitaanerat, ileqqaarnissamut tun­ngavissap qanoq naatsorsorneqartarnera aamma soraarnerussutisiaqalernissamut akiliutivit qanoq uppernarsarnissaat pillugit Akileraartarnermut Aqutsisoqarfiup takutitassiai.

Soraarnerussutisiaqalernissamut aaqqissuussinermut peqataasussaatitaaneq pillugu nalunaarsuineq Akileraartarnermut Aqutsisoqarfiup isumagisaraa. Uppernarsaatinik tunniussivissatut piffissaliussaq qanilligaangat ulapaartuaannarpugut.

Soraarnerussutisiaqalernissamut siorna ileqqaarsimasassanik akiliinissamut angumersi­soqarsinnaanerata amerlasuunit paasineqarsimanera nuannaarutigaarput. Ornigullutik mail­ikkulluunniit saaffiginnittut tamaasa sapinngisannguarput tamaat sullinniarlugit ulapittorujussuuvugut.

Kim Neumann Nielsen,
Akileraartarnermut Aqutsisoqarfimmi pisortaq

Siorna ileqqaarsimasassannik akiliinissat angumeriumagukku makku nassiullugillu upper­narsassavatit:
  1. Soraarnerussutisiaqalernissamut aaqqissuussinermut akiliisimaneq illit nammineq akiliinerisimassavat imaluunniit allap, ass. sulisitsisuit, illit sinnerlutit akiliinerisimassavaa
  2. Akiliineq soraarnerussutisiaqalernissamut aaqqissuussinermut inatsimmi pine­qar­tumut akiliutaasimassaaq:
    1. Kalaallit Nunaanni; SISA, Grønlandsbanken aamma Bank Nordik Nuuk
    2. Danmarkimi; soraarnerussutisiaqalernissamut sillimmasiisarfiit aamma soraarnerussutisiaqalernissamut aningaasaateqarfiit (aningaaserivinnili ileqqaakkat pineqanngillat)
  3. Ulloq soraarnerussutisiaqalernissamut aaqqissuussinermut akiliiffik
  4. Ukioq ileqqaarfigisat aammalu aningaasat soraarnerussutisiassanut akilikkavit kisitsisitaat eqqortoq
Uppernarsaatinut piumasaqaatit sisamat tamaasa eqquutsinngikkukkit, akiliineq 2019-mut akiliinertut isigineqarani ukiumut 2020-mut akiliinertut isigineqassaaq.

 

Paasissutissat

·         Soraarnerussutisiaqarnissamut aaqqissuussinermut peqataasussaatitaaneq Inatsisartuni partiinit tamanit 2016-imi akuersissutigineqarpoq.

·         Soraarnerussutisiaqarnissamut aaqqissuussinermut peqataasussaatitaaneq pillugu inatsit 2018-imi atuutilerpoq.

·         Akissarsiortut 2019-imi aningaasarsiamik 5%-ii ileqqaartussaavaat. Namminersorlutik inuussutissarsiummik ingerlataqartut 3%-it ileqqaartussaavaat.

·         Suliffillit amerlanerpaartaat sulisitsisortik aqqutigalugu namminerluunniit isumagalugu soraarnerussutisiaqalernissaminnut ileqqaagaqareerput.

·         Paasissutissat amerlanerusut uani takusinnaavatit www.aka.gl/kl-GL/borger/pension

 

 

Qulaani allassimasut pillugit innuttaasut apeqqutissaqarunik

Attavissaavoq: Akileraartarnermut Aqutsisoqarfik, Intaleeqqap Aqqutaa 1, Postboks 1605, 3900 Nuuk, tlf. + 299 34 65 00, mail: tax@nanoq.gl

 

Qulaani allassimasut pillugit tusagassiortut apeqqutissaqarunik

Attavissaavoq Søren Würtz, Akileraartarnermut Aqutsisoqarfik, oqar. + 299 34 65 79, mail: sowu@nanoq.gl.