Nunatsinni sukkornermik inooriaatsimillu patsiseqartumik nappaateqartunut iliuuseqarnerup nukittorsarneqarnissaa

Inuunerissaavimmi Steno Diabetes Center Grønland-imi siulersuisut siullermik Nuummi ataatsimeeqqammerput. Naalakkersuisoqarfimmi pisortaq Tine Pars siulersuisuni siulittaasuuvoq, siulersuisunilu suleqatigai peqqinnissaqarfimmi pisortaq Joanis Erik Køtlum, Novo Nordisk Fondenimit Senior Vice President Jannik Hilsted, nakorsaaneq Berit Bjerre Handberg, Peqqinnissaq pillugu Ilisimatusarnikkut Ingerlatat pillugit Siunnersuisoqatigiit sinnerlugit ilaasortaq nunap immikkoortuani nakorsat ittuat Gert Mulvad, Naalakkersuisoqarfimmi pisortaq Julie Præst Wilche, Kujataani peqqissaasut pisortaat Inge Kolby Pedersen aammalu Dronning Ingridip Napparsimavissuani nakorsaasersuinermut immikkoortumi peqqissaasuuneq Anne Birgitte Jensen.

Inuunerissaavimmik Steno Diabetes Center Grønland-imi sulinerput maanna aallartittoq nuannaarutigeqaara. Suleqatigiinnermi anguniagassatut takorluugarput annertuvoq, suliniullu innuttaasunut sukkortunut inooriaatsillu nassatarisaanik nappaateqartunut katsorsaanerup inuunerullu pitsaassusaata tungaasigut pitsaaquteqassasoq naatsorsuutigaara, Peqqissutsimut Naalakkersuisoq Anna Wangenheim oqarpoq, nangillunilu; Peqatigalugu peqqinnissaqarfiup peqqissaaviini tamani telemedicinimut atortutaartitsoqassaaq piginnaanngorsaanerlu aallutarineqarnerussalluni. Ukiuni aggersuni Novo Nordisk Fondenimik suleqateqarneq sukkortut inooriaatsillu nassatarisaanik nappaateqartut kisimik iluaqutiginavianngilaat, Peqqinnissaqarfilli tamakkiisumik nukittorneqassaaq”, Peqqissutsimut Naalakkersuisup Anna Wangenheimip oqaatigaa.

Inuunerissaavik Steno Diabetes Center Grønland peqqinnissaqarfimmut ilaavoq, maannakkuugallartumillu Nuummi Dronning Ingridip peqqissaaviani inissisimalluni. Sullissiviup nutaap pilersinneqarnera aallartisarneqareerpoq, 2024-milu illorsuup naammassinissaa naatsorsuutigineqarpoq. Piffissami qaninnermi nunap immikkoortuini inooriaaseq pillugu suliniutit tapersersorniarlugit Inuunerissaavik Steno Diabetes Grønland-ip nunap immikkoortuini napparsimaviit suleqatiginissaannut isumaqatigiissuteqaqatigissavai, tamannalu nunatsinni katsorsartittunut tamanut iluaqutaassaaq. Novo Nordisk Fondenimit aningaasaliissuteqarnikkut Inuunerissaavik Steno Diabetes Center Grønland pilersinneqarsinnaanngorsimavoq.

Paasisaqarnerorusukkuit naalakkersuisup allattaa Frederik Siegstad oqarasuaat +299 23 39 93 imaluunniit email frsg@nanoq.gl aqqutigalugit pissarsiarineqarsinnaapput