Isumaqatigiissutinut isumalioqatigiissitaq pisariillisaalluni aallartippoq

Ataasinngorneq 31. august Isumaqatigiissutinut Isumalioqatigiissitaq Katuami ataatsimiippoq. Isumalioqatigiissitap suliaanut sinaakkutit inissinneqarput, massakkullu isumalioqatigiissitap suliassaqarfimmik naammassiuminaatsumik pisariillisaanissamik siunnersuusiornissaq suliassarilerpaa. Isumalioqatigiissitap pilersinneqarneranut tunngaviusut tassaapput isumaqatiginninniartarnermi allaffissornermilu suleriaatsit pisariuvallaarneri.

Isumalioqatigiissitap taamaammat pingaarnertut suliassarivaa isumaqatiginninniartarnerit ingerlanneqartarnerat pillugu ileqqoreqqusaasut misissornissaat aamma pisariillisaanissamut siunnersuuteqassalluni, ataatsikkullu suliassami peqataasut pissaaneqarneranik innarliinngitsumik aaqqiinissamut siunnersuusiornissaq.

”Suliassaq pisariuvoq, kisianni Katuami oqallinnerit ersersippaat, sulisitsisunit aamma sulisut tungaanniit pisariillisaanissamut nutaaliornissamullu piumassuseqartoqartoq. Isumalioqatigiissitami oqallinneq ingerlalluarpoq aamma kikkut tamarmik oqaaseqarusupput, kiisalu isumalioqatigiissitami suliamut tunngaviliisoqarluarluni” Siulittaasoq Martha Labansen oqaaseqarpoq.

1. septembarimi isumalioqatigiissitap isumaqatigiissutinik pisariillisaanissamut suliaq aallartereerpaa. Tassani isumalioqatigiissitap pingaarnertut sammisassap aallaavii oqallisigivai aamma isumaqatigiissutit pisariillisarnissaannut tunngatillugu siunnersuutinik suliaqartussamik suleqatigiissitaliorpoq.

Isumalioqatigiissitap tulliani ataatsimiinnissaa novemberip naanerani 2020-mi pilersaarutaavoq, tassani akissaatit aaqqissugaanerat, isumaqatigiissutinik isumaqatiginninniarnernut piffissaliussaq aamma isumaqatigiissitsiniartarneq isumaqatigiissaarisarnermullu ileqquusut oqallisigineqassapput.

 

Attaveqaat:

Isumaqatigiissutinut Isumalioqatigiissitami siulittaasoq Martha Labansen, oqarasuaat 263513

 

Paasissutissaqartitsivik

Ullumi Kalaallit Nunaanni  isumaqatigiissutinik isumaqatiginninniarnerit sulisartut kattuffiinut 20-nut agguagaapput aamma Namminersorlutik Oqartussat  pingaarnertut isumaqatigiissutinik 24-nik, isumaqatigiissutinik 87-inik kiisalu isumaqatigiissutit ataasiakkaat malitsigisaannik 125-nik peqarlutik.

Isumalioqatigiissitaq 2021 naalernerata tungaanut isumaqatigiissutinik aaqqissuussat qanoq piuminarsarneqarnissaannut tunngatillugu siunnersuusiussaaq.

Isumaqatigiissutinut isumalioqatigiissitaq 2018-imi Naalakkersuisooqatigiinnissamik isumaqatigiissummit politikikkut aallaaveqarpoq aamma sulisitsisut sulisullu isumalioqatigiissitami oqimaaqatigiittumik arfinilikkaarlutik sinniisoqarput. Isumalioqatigiissitaq Martha Labansenimit siulersorneqarpoq.

Isumalioqatigiissitaq pillugu paasissutissat sukumiinerusut uani qupperneqarsinnaapput https://naalakkersuisut.gl/kl-GL/Naalakkersuisut/Naalakkersuisoqarfiit/Finans/Overenskomstkommissionen