Ukiumoortumik Avatangiisinut Pinngortitamullu Nersornaasiuttakkamut piukkussat innersuuguk

Ukiumoortumik Avatangiisinut Pinngortitamullu Nersornaasiuttakkamut piukkussannik innersuussisinnaalerputit
Ukioq manna Avatangiisinut Pinngortitamullu Nersornaasiuttagaq inunnut, suliniaqatigiiffinnut suliffeqarfinnulluunniit, pinngortitaq avatangiiserput alianaatsorsuarlu minguitsinniarlugu immikkut ittumik suliniuteqarsimasunut tunniunneqassaaq. Taamaattumik inummik, suliniaqatigiiffimmik suliffeqarfimmilluuniit, tamannarpiaq pillugu immikkut ittumik suliniuteqarsimasunik ilisimasaqaruit, 2020-mi Avatangiisinut Pinngortitamullu Nersornaasiuttakkamut innersuussinissannut periarfissaqalerputit.

Pinngortitaq ataatsimoorussaraarput
Tamatta ataatsimoorluta pinngortitamut akisussaaffeqarnitsinnik ilisimasaqarnissarput Suliffeqarnermut, Ilisimatusarnermut Avatangiisinullu Naalakkersuisumut Jess Svane-mut pingaaruteqartorujussuuvoq.

”- Pinngortitaq minguitsuutinniarlugu tamatta sapinngisatsinnik ikioqatigiissaagut, taamaalilluta tamatta pinngortitami angalasinnaaniassagatta atuisinnaaniassagattalu”.

”- Aasaq takkukkaagat ukiumi piffissaq, akunnitsinni amerlasuujusugut qilanaarisarput isumalluarfippullu takkuttarpoq. Piffissaq angalalluta ukiornissaanut piliffigisartagarput. Pinngortitami angalaneq kulturitsinnit kinaassutsitsinnillu immikkoortinneqarsinnaanngilaq, pinngortitarlu mianerisassaraarput kinguaariinnilu inuiaqatigiinni ilisarnaatigalugu. Taamaattumik tamatta pinngortitamiissinnaanissarput pillugu akunnitsinni eqqaasitseqatigiittarnerput ingerlatiinnassavarput”.

”- Ullumikkut pigisat eqqakkallu pinngortitamiittussaanngitsut siumoorsinnaasarpavut – tamaangaannaq eqqakkat imaluunniit nunamut tipisimasut. Taamaattumik inuit, suliffeqarfiit suliniaqatigiiffiilluunniit, namminneerlutik – aammalu allanut isumassarsiuillutik – aalajangersimasunik suliniuteqarlutik pinngortitamik avatangiisitsinnik, pinngortitamut uatsinnullu iluaqutaasumik nuannaarutaasumillu minguitsitsiniartut nersorneqarnissaat Naalakkersuisunit kissaatigineqarpo
q,” Suliffeqarnermut, Ilisimatusarnermut Avatangiisinullu Naalakkersuisoq Jess Svane oqarpoq.

Qanoq iliorluni Nersornaammut innersuussisoqassava?
Kikkulluunniit nersornaammut innersuussinissamut periarfissaqarput.

Ukiumoortumik Avatangiisinut Pinngortitamullu Nersornaammut innersuussutit tunngavilersuummik naatsumik, ilinnut attaveqarnissamut paasissutissanik kiisalu inunnut, suliniaqatigiiffinnut suliffeqarfinnullunniit innersuunniakkannut attaveqarnissamut paasissutissanik imaqassaaq.

Ukiumoortumik Avatangiisinut Pinngortitamullu Nersornaammut innersuussutit uunga nassiutissavat:
E-mail: pan@nanoq.gl imaluunniit,
Ilisimatusarnermut Avatangiisinullu Naalakkersuisoqarfik
Postboks 1614
3900 Nuuk

Innersuussinissamut killigitinneqarpoq 15. oktobari 2020.

Paasissutissat:
Naalakkersuisup Namminersorlutik Oqartussat ukiumoortumik Avatangiisinut Pinngortitamullu Nersornaasiuttagaat inummut, sullissivimmut imaluunniit suliniaqatigiiffimmut, Kalaallit Nunaanni avatangiisinullu pinngortitamullu tunngatillugu immikkut malunnaatilimmut tunniuttarpaa.

2004-mi ukiut tamaasa Avatangiisinut Pinngortitamullu Nersornaasiuttakkamik tunniussisoqartalissasoq Naalakkersuisunit aalajangerneqarpoq. Nersornaat siulleq 2007-imi tunniunneqarpoq, tamatumalu kingorna ukiut tamaasa nersornaasiisoqartarpoq.

Kikkulluunniit kiap nersornaaserneqarnissaanut innersuussisinnaapput.