Kujataani suleqateqatigiinnissamut ataatsimoorussinissamullu periarfissaalluartut

Peqqissutsimut Naalakkersuisoq Anna Wangenheim, piffissami 31. augustimiit 4. septemberip tungaanut kujataani piffinnut assigiinngitsunut angalavoq. Narsarsuarmi, Narsami, Alluitsup Paani, Nanortalimmi Qaqortumilu peqqinnissaqarfimmi sulisut, najukkami siunnersuisoqatigiit suliffeqarfiillu naapinnissaat angalanermi siunertaasimavoq.

”Innuttaasut peqqinnissaqarfiullu imminnut ungasilliartuinnarnerat innuttaasut ilaasa oqaatigigaat angalanitsinni ajoraluartumik misigaarput. Oqallinnermi inuillu attaveqatigiittarfiini nipit atorneqartut sakkortusinnaapput ilaannikkullu illuinnaasiortuusarlutik. Taamatut ineriartortoqarnera mumisinniarlugu innuttaasut peqqinnissaqarfimmut tunngatillugu misigisaasa aallunneqarnissaat kissaatigaara. Innuttaasut tusaaneqartutut misiginissaat pigaaruteqarluinnaqqissaarpoq aamma peqqinnissaqarfimmik piginneqataasutut misiginissaat qulakkiissavarput, taamaasillutik peqqinnissaqarfimmi sulisutsinnik paarseqataalerlutik ” Peqqissutsimut Naalakkersuisoq Anna Wangenheim oqarpoq.

Ataatsimiinnerni unamminiarnartut imaannaanngitsut arlallit, ilaatigut hashimik imigassamillu atornerluinerit, kilaat kumaallu siaruarnerat, anigoruminaatsumik sakialluummik nappaatilippassuit, angerlarsimaffeqanngitsuuneq aamma suliffeqarfinni pisortallu suliffeqarfiini sulisussaaruttarnerit erseqqissarneqarput.

Kommune Kujallermi borgmesterip tullianik ataatsimeeqateqarluni angalaneq naammassineqarpoq.

”Innuttaasut peqqinnissaqarfimmik kommunimiillu isumaginninnikkut tunniuttakkanik pisariaqartitsinerat annertusiartorpoq. Nunap immikkoortuani sulisussarsiortarnerup ilinniarsimasunillu attassiinnarnissap tungaatigut taama unamminiarnartoqartigisoqartillugu aningaasanik naammattunik tunniussinissaq ajornakusoorsinnaavoq. Ineriartorneq tamanna mumisissagutsigu akisussaaffik immikkoortutut kisermaanneqarsinnaanngilaq. Susassaqarfiit assigiinngitsut suleqatigiinnissaat aatsaat taama pisariaqartigilerpoq” Peqqissutsimut Naalakkersuisoq Anna Wangenheim oqarpoq.

Suliniutit pitsaasut arlallit ataatsimiinnerni erseqqissarneqarput Nanortalimmi peqqinnissaqarfiup, kommunip politiillu akornanni meeqqat sumiginnakkat pillugit suliniutit angusarissaarluarfiusut pillugit suleqatigiilluartoqarpoq. Narsami Narsarsuarmilu ataatsimut suliniuteqartoqarnera najukkami inuiaqatigiinnut nuannersumik sunniuteqarnera ersarippoq tamannalu innuttaasuni nuannaarutaavoq.

Anna Wangenheim nangilluni oqarpoq:

”Maligassiuilluartunik suleqateqarnerput ingerlateqqissavarput immitsinnullu ilinniarfigaluta. Napparsimaveqarfimmi ataatsimoorussamik unamminartut aaqqiiviginissaat anguniarlugu Borgmester Kiista P. Isaksen suleqatigiinnissamut periarfissat pillugit oqaloqatigiinnissamut attaviginiarpara”.


Paasisaqarnerujumagaanni naalakkersuisup allattaa Frederik Siegstad, oqarasuaammut 233993, email: frsg@nanoq.gl-imut attavigineqarsinnaavoq.