Kalaallit qallunaallu suleqatigiillutik iliuusissaat siulleq aallartippoq

Sisamanngormat inunnik isumaginninnermut siunnersortit tallimat Danmarkimiit Maniitsumut Sisimiunullu tikipput. Inunnik isumaginninnermut siunnersortit Qeqqata Kommuniani meeqqat inuusuttullu pillugit sulianik isumaginninnissamut ikiuutissapput. Ikiuunneq Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinnerup innersuussutaasa ilagaat. Inunnik isumaginninnermik siunnersortit tikinnissaannut aqaguttoq ikiuunnermut aallarniutitut Naalakkersuisup Martha Abelsenip Qeqqata Kommuniani borgmesteri tikeraarpaa.

Ulloq 3. septembari 2020 inunnik isumaginninnermik siunnersortit tallimat Danmarkimiit Maniitsumut Sisimiunullu tikipput. Inunnik isumaginninnermik siunnersortit Qeqqata Kommuniani meeqqat inuusuttullu pillugit sulianik isumaginninnissamut ikiuutissapput. Meeqqanut suliassaqarfimmi suliat uninngasut ikilisinnissaat ikiuunnermut siunertaavoq, taamaaliornikkut meeqqat inuusuttullu pisariaqartitaminnik piffissaq eqqorlugu ikiorneqarsinnaaqqullugit. Ikiuunneq Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinnerup innersuussutaasa ilagaat. Inunnik isumaginninnermik siunnersortit Danmarkimi Københavns Kommunemit Randers Kommunemillu aggerput.

Ulloq 2. septembari 2020 Isumaginninnermut, Ilaqutariinnut Inatsisinillu Atuutsitsinermut Naalakkersuisup Martha Abelsenip Qeqqata Kommuniani borgmesteri Malik Berthelsen Sisimiunut tikeraarpaa. Inunnik isumaginninnermik siunnersortinit ikiorneqarnissamut aallartitsinertut tikeraarneq pivoq. Kalaallit qallunaallu suleqatigiinneranni innersuussutit nalinginnaasumik ilisimatitsissutiginissaat tikeraarnermut aamma siunertarineqarpoq.

Naalakkersuisoq Martha Abelsen oqarpoq:
”Sulianik isumaginninnermik ikiuineq ingerlaannaq aallartimmat assut naammagisimaarpara. Meeqqat inuusuttullu pisariaqartitaannik ikiorneqarsinnaaqqullugit meeqqanut suliassaqarfimmi suliat uninngasut ikilisinnissaat pingaaruteqarluinnarpoq. Ilutigitillugu najukkami sulianik isumaginnittut nalunaarutiginninnernut nutaanut piffissaqarlutillu nukissaqalissapput.”

2020-p 2021-llu ingerlaneranni sulianik isumaginninnernut ikiuunnissamik iliuuseqarneq nunap kommuniini tamani ingerlanneqassaaq. 2019-2020-mi Kommuneqarfik Sermersooq sulianik isumaginninnermik pilertortumik iliuuseqarnermi ikiorneqarpoq. Qeqertalik Kommunemit kissaateqarneq naapertorlugu Qitiusumik Siunnersuisarfiup Task Force-a inuilluunniit imitsittartut aqqutigalugit kommunemi iliuuseqartoqassaaq.

Attavissaq
Paasisaqarneruniaraanni attavigineqassaaq naalakkersuisup allattaa Inger Heilmann Larsen uunga e-mailimut: ihla@nanoq.gl imaluunniit oqa. + 299 554160