Timmissat ineqarfiinut ungasissusissaq pillugu erseqqissaaneq

Qisuttuut kitaani qilanngat ineqarfiinut qanippallaamik angalasoqartarneranik Naalakkersuisoqarfik ilisimatinneqarpoq. Matumuuna erseqqissaatigineqassaaq Timmissanik illersuineq piniarnerlu pillugit Namminersorlutik Oqartussat nalunaarutaanni nr. 17-imi, 28. oktober 2019-imeersumi (matuma kingorna Timmissat pillugit nalunaarummi) timmissat ineqarfiinut ungasissutsinut piumasaqaatit pillugit aalajangersakkat eqquutsinneqassammata. § 3, imm. 1 aamma § 6, imm. 1 malillugit qilanngat Kalaallit Nunaanni eqqissisimatitaapput.

Timmissat pillugit nalunaarummi § 12, imm. 1 naapertorlugu piffissami 15.04.-miit – 15.09.-imut timmissat ineqarfiisa eqqaanni aallaammik eqqarneq allatulluunniit ajoqusersuineq angallammillu knob-inik 3-nik sukkanerusumik angalaneq inerteqqutaavoq, timmissat ineqarfii ima ungasitsigalugit qaninnerullugilluunniit:
  • 1000 meter, timmissat ineqarfiat appanit, appanit sigguttuunit, apparlunnit, appaliarsunnit, taateraanit, qaqullunnit oqaatsunilluunniit najorneqarpat, aamma
  • 200 meter, timmissat ineqarfiat qeqertaappat qeqertaasaappalluunniit miternit siorartuunit, miternit siorakitsunit, serfanit, qilannganit, imeqqutaallanit naajanilluunniit taateraajunngitsunit najorneqarpat.
Erseqqissaatigineqassaaq ungasissutsinut piumasaqaatit pillugit aalajangersakkat unioqqutinneqarneranni Kalaallit Nunaannut Pinerluttulerinermik Inatsit malillugu akiliisitsisoqarsinnaammat.

Erseqqinnerusumik paasisaqarusukkuit immikkoortortami pisortaq Amalie Jessen, Aalisarnermut, Piniarnermut Nunalerinermullu Naalakkersuisoqarfimmut attavigiuk, oqarasuaat: 34 53 04, e-mail: amalie@nanoq.gl