UNICEF aamma Namminersorlutik Oqartussat meeqqanut suliniutaat - NAKUUSA – ukiut qulinngortorsiorpoq

Ukiut qulit ingerlaneranni NAKUUSA malunnaatilinnik angusaqarsimavoq. Kalaallit Nunaanni Meeqqat pillugit Siunnersuisoqatigiit arfineq-marluk pilersinneqarsimapput, meeqqanik ataatsimeersuartitsinerit qulingiluat ingerlanneqarsimapput paasisitsiniaanerillu ingerlanneqarsimapput tamatumalu kingunerisaanik ullumi innuttaasut 92 procentii NAKUUSA-mut ilisimasaqalersimapput.

”Inuiaqatitsinni meeqqat oqariartuutaat pillugit tusaaneqarluarnissaannut Nakuusa-p sinaakkusiisinnaasimanera nunatsinni meeqqanut inuusuttunullu aamma innuttaasunut tamanut alloriarneruvoq annertoorujussuaq. 2019-imi meeqqat ataatsimeersuarnerannit meeqqat qimarngueqalernissaat pillugu innersuussut, Kalaallit Nunaanni meeqqanut inuusuttunullu pitsaanerusumik suliniuteqarnissaq pillugu kalaallit qallunaallu oqartussaasoqarfiisa suleqatigiinneranni tigussaasumik suliniutinngorsimavoq”, taama oqarpoq Isumaginninnermut, Ilaqutariinnut Inatsisinillu Atuutsitsinermut Naalakkersuisoq, Martha Abelsen.

Sulineq aggusti 2020-mi aallartippoq - Naalagaaffiit Peqatigiit Meeqqat Pisinnaatitaaffii pillugit isumaqatigiissutaat tunngavigalugu - Kalaallit Nunaat tamakkerlugu meeqqanut periarfissanik pitsaanerpaarpaanik pilersitsinissaq siunertaralugu namminersorlutik oqartussat UNICEF-ilu suleqatigiinnissamut isumaqatigiissummik atsioqatigiimmata, Kalaallit Nunaannilu kulturi namminersortumillu suliassaqarfittut inissisimanera ataqqiniarlugu. Suleqatigiinnissamut isumaqatigiissutip suleqatigiilluni pilersaarut, NAKUUSA-mik taaguuserneqartup aallarnisaatigaa. 2015-imi suleqatigiinnissamut isumaqatigiissut nutarterneqarpoq, ukiunik tallimanik sivitsorneqarluni.

“Kalaallit meerartaannut suliniutitigut tunniussimasatsinnut assut tulluusimaartorujussuuvunga aammalu meeqqat pillugit sulinitta ingerlateqqinnissaanut qilanaarlunga. Kalaallit Nunaanni qitiutissimasarput tassaajuaannarsimavoq meeqqat pisinnaatitaaffii oqariartuutaallu siuarsarlugit meeqqanullu toqqissisimanartunik ineriartornartunillu sinaakkusiinissamut qulakkeerinninnissaq. Ukiuni kingullerni qulini NAKUUSA pillugu Namminersorlutik Oqartussallu suleqatigiinnitsinni pitsavinnik angusaqarsimavugut. Taamaattoqaraluartorli suli annertuunik unammilligassaqarpoq, taamaattumik UNICEF-imi suliniutip pitsaanerulernissaanut nanginnissaanullu piareersimavugut”, taama oqarpoq UNICEF-imi allattaaneq, Karen Hækkerup.

Ukiuni qulini NAKUUSA meeqqat pisinnaatitaaffiinut tunngatillugu eqqumaffeqalernerulernermik ersarissaanermillu pilersitsisimavoq, aalajangiinerni meeqqat ilanngutinneqarnissaat qulakkeerinnissimalluni kiisalu meeqqanut inuusuttunullu iluaqutaasunik isummanik pitsaasunik allannguinernik pilersitsisimalluni.

”Misissuinitta kingulliup takutippaa aaqqitassanik suliassarpassuaqartoq, aallartereerpugullumi. Suleqatigiilluarutta kalaallit meerartaannut iliuuseqarluarnerusinnaasugut qularinngilara,” Maliina Abelsen taama oqarpoq, taanna Isumaginninnermut, Ilaqutariinnut Inatsisinillu Atuutsitsinermut Naalakkersuisuunermini pilersaarummut NAKUUSA-mut pilersitseqataasimavoq. Maanna suliniut ingerlateqqippaa - Kalaallit Nunaanni UNICEF-imi suliniutinut pisortatut.

Ukiup 2020-p naalernerani Namminersorlutik Oqartussat UNICEF-illu isumaqatigiissuteqaqqinnissartik naatsorsuutigaat.

Attavissaq
Sukumiinerusumik paasissutissanik piniaraanni attavissaq naalakkersuisup allattaa Inger Heilmann Larsen e-mailikkut: ihla@nanoq.gl imalt. oqa. + 299 554160 aammattaaq Maliina Abelsen, Mabelsen@unicef.dk oqa. +299 548660